Ish-presidenti i Shteteve të Bashkuara, Joe Biden, është diagnostikuar me një formë agresive të kancerit të prostatës që i është përhapur edhe në kocka, njoftoi të dielën zyra e tij personale.
“Javën e kaluar, Presidenti Biden iu nënshtrua një ekzaminimi mjekësor për shkak të një rritjeje të sapozbuluar në prostatën e tij, pasi kishte probleme të rënda urinare. Të premten, ai u diagnostikua me kancer të prostatës, me një rezultat Gleason prej 9 (Grupi 5), me metastaza të konfirmuara në kocka”, thuhet në deklaratë.
Shtohet se, megjithëse është një formë më agresive e sëmundjes, kanceri duket se është i ndjeshëm ndaj hormoneve, gjë që lejon një trajtim më efektiv.
Biden dhe familja e tij aktualisht po shqyrtojnë mundësitë e terapisë në konsultim me mjekët, thuhet në fund të deklaratës.
