Lidhja e Historianëve të Kosovës “Ali Hadri” dega në Deçan, me shqetësim të thellë konstaton se për herë të 19-të me radhë ka dështuar përpjekja për konstituimin e legjislaturës IX të Kuvendit të Kosovës. Ky bllokim institucional i paprecedent përbën një goditje të rëndë ndaj rendit demokratik dhe funksionimit kushtetues të shtetit të Kosovës.
Moskonstituimi i Kuvendit të Republikës së Kosovës për një kohë kaq të gjatë jo vetëm që e cenon besimin qytetar në institucionet shtetërore, por rrezikon seriozisht paralizimin e sistemit parlamentar, pengon miratimin e ligjeve dhe ushtrimin e funksioneve themelore të përfaqësimit demokratik.
Kuvendi është institucioni më i lartë përfaqësues i qytetarëve dhe nuk guxon të mbetet peng i kalkulimeve të ngushta politike dhe mungesës së vullnetit për dialog e marrëveshje. Zvarritja e konstituimit përbën edhe një mungesë respekti ndaj qytetarëve që kanë ushtruar të drejtën e votës me pritje të qarta për ndryshim dhe funksionim institucional.
Lidhja e Historianëve të Kosovës “Ali Hadri” dega në Deçan u bën thirrje të gjitha subjekteve politike që të tregojnë pjekuri dhe përgjegjësi shtetërore, të tejkalojnë interesat partiake dhe të kontribuojnë në konstituimin sa më të shpejtë të Kuvendit të legjislaturës IX, si parakusht për funksionimin normal të jetës institucionale në vend.
Kosova ka nevojë për institucione aktive, funksionale dhe përfaqësuese. Vonesat e mëtejshme janë të papranueshme dhe cenojnë seriozisht perspektivën demokratike të shtetit tonë.
Lidhja e Historianëve të Kosovës “Ali Hadri” dega në Deçan
