Kryeministri në detyrë i Kosovës, Albin Kurti, derisa ka folur për rëndësinë e “Defender Europe 2025” si ushtrimi më i madh që Ushtria e Shteteve të Bashkuara e realizon në kontinentin e Evropës, ka treguar se në ushtrimet që do t’i zhvillojë FSK-ja, do të ketë edhe qitje me zjarr të vërtetë me sistemet e armëve të blera dhe që tha se po vazhdojnë të blihen për ushtrinë, nga Qeveria e Kosovës.
“Gjatë këtij ushtrimi njësitë e FSK-së do të zhvillojnë operacione luftarake sulmuese, mbrojtëse dhe të stabilitetit. Në ushtrim do të ketë edhe qitje me zjarr të vërtetë me sistemet e armëve të blera dhe që po vazhdojnë të blihen nga Qeveria e Kosovës për ushtrinë tonë”, ka treguar shefi në detyrë i qeverisë.
Sipas Kurtit, veçantia më e rëndësishme në ushtrimin “Defender Europe 2025” është që Kosova është vendi i përzgjedhur nga Ushtria e Shteteve të Bashkuara të Amerikës për të vendosur komandën e Divizionit 28 të këmbësorisë.
“Përveç komandës së Divizionit 28 në Zonën e Trajnimit në Babaj të Bokës njësiteve të FSK-së do t’u bashkëngjiten edhe njësi ushtarake të Gardës së IOWA-s, njësi dhe personel nga Republika e Shqipërisë, Republika e Kroacisë, Maqedonia e Veriut dhe Bullgaria”, shtoi ai.
Në “Defender Europe 2025” që këtë vit shtrihet në tri zona gjeografike të Evropës, kreu në detyrë i qeverisë thotë se do të angazhohen 25 mijë ushtarakë nga 29 shtete të NATO-s dhe vendeve partnere.
“Në zonën e Evropës juglindore ku hyn edhe Kosova do të marrin pjesë 12.000 ushtarakë nga 19 shtete. Republika e Kosovës do të jetë vend nikoqir në mesin e 18 vendeve nikoqire dhe Forca e Sigurisë së Kosovës do të marrë pjesë me përafërsisht 1.000 trupa në ushtrimet që do të zhvillohen në Kosovë, Shqipëri, Kroaci dhe Maqedoni të Veriut”, tha Kurti.
Ky ushtrim, thotë Kurti, ka rëndësi të madhe për rritjen e ndërveprueshmërisë së FSK-së me ushtritë e vendeve partnere dhe tregon për rritjen e besimit që SHBA-të dhe partnerët kanë në Qeverinë e Republikës, Ministrinë e Mbrojtjes dhe para së gjithash në profesionalizmin e ushtrisë.
“Kosova po dëshmon që është e aftë për të mikpritur dhe për të organizuar në territorin e saj ushtrime komplekse që kërkojnë planifikim, organizim dhe mbështetje të nivelit shumë të lartë”, shtoi ai.
