Një përleshje midis bandave që mbanin hanxhar në një qendër tregtare në Melburn ka bërë që shteti australian i Viktorias të përshpejtojë ndalimin e parë në vend për shitjen e kësaj arme. Ndalimi, i cili pritej të hynte në fuqi në shtator, do të fillojë të mërkurën në Victoria. Vendimi vjen pasi dy bandat u përleshën në Qendrën Tregtare Northland, në periferi të Prestonit, dje pasdite. Një 20-vjeçar u plagos rëndë dhe ndodhet në spital.
Kryeministrja e Viktorisë, Jacinta Allan, tha se ndalimi do të “ndërpriste furnizimin” dhe shtoi: “Komuniteti nuk duhet të merret me këto lloj armësh në qendrat tregtare, dhe as policia jonë nuk duhet të merret me to.”
Dy të mitur midis të arrestuarve
Dy të mitur, 16 dhe 15 vjeç, u akuzuan dje për shkaktim të trazirave, shkaktim të qëllimshëm të plagosjes dhe posedim e përdorim të një arme të ndaluar. Policia njoftoi sot se dy të rinj të tjerë, të moshës 20 dhe 18 vjeç, janë arrestuar dhe po merren në pyetje. Të katër personat janë të njohur për policinë.
“Ishte një përballje e rregulluar midis dy bandave rivale të të rinjve, pa asnjë kalimtar të lënduar”, tha zëvendëskomisioneri i policisë David Clayton. Ai shtoi se incidente të tilla në Victoria ishin “të rralla, por të frikshme”. Ai gjithashtu theksoi se një në dhjetë sulme me thikë në atë shtet kryhen nga të rinj dhe shpesh ndodhin në vende publike.
Dhjetë persona morën pjesë në konflikt.
Shërbimet e emergjencës u thirrën në një qendër tregtare në Preston, rreth 11 kilometra në veri të qendrës së qytetit të Melburnit, pak pas orës 14:30 sipas orës lokale dje, pas raportimeve për një përleshje ku ishin përfshirë deri në dhjetë persona. Policia njoftoi se hetimi është ende duke vazhduar dhe se pret arrestime të tjera. Tre nga katër hanxharet e përdorura në sulm u konfiskuan. Kryeministri Allan e quajti sulmin të tmerrshëm.
“Nuk duhet të lejojmë kurrë që vendet ku mblidhemi, ku takohen familjet, bëjnë pazar dhe shijojnë një fundjavë të qetë, të bëhen vende nga të cilat kemi frikë”, tha ajo në një konferencë për shtyp. “Mbretërisë së Bashkuar i janë dashur 18 muaj për të ndaluar hanxharet. Do ta bëjmë brenda gjashtë muajsh”, shtoi ajo.
