Elon Musk ka njoftuar se po largohet nga administrata e Donald Trump, ku drejtonte zyrën e shkurtimit të qeverisë amerikane. Gjatë mandatit të tij, qindra mijëra punonjës u pushuan nga puna ose u caktuan në vende të tjera pune.
Në një postim në platformën e tij X, njeriu më i pasur në botë falënderoi Trump për mundësinë për të drejtuar Zyrën e sapokrijuar të Efikasitetit të Qeverisë, e njohur me akronimin DOGE.
Sipas BBC-së, Shtëpia e Bardhë të mërkurën në mbrëmje filloi procesin formal të largimit të tij nga pozicioni i “punonjësit special qeveritar”, i cili i lejonte atij të kryente punë federale deri në 130 ditë në vit.
Kritikoi një ligj të rëndësishëm të Trumpit
Pozicioni i Muskut ishte i përkohshëm dhe largimi i tij pritej, por koha është e rëndësishme sepse vjen një ditë pasi ai kritikoi publikisht një projekt të madh legjislativ të administratës Trump.
“Ndërsa mandati im si punonjës i posaçëm qeveritar skadon, dua të falënderoj Presidentin Trump për mundësinë për të ulur shpenzimet e panevojshme”, shkroi Musk në X.
“Misioni i DOGE-it do të bëhet vetëm më i fortë me kalimin e kohës, ndërsa bëhet një mënyrë jetese në të gjithë qeverinë”, shtoi ai.
Musk më parë tha se ishte i zhgënjyer me propozimin e buxhetit të Trump, i cili përfshin ulje taksash prej disa trilionë dollarësh dhe rritje të shpenzimeve ushtarake.
Në një intervistë me CBS, partnerin amerikan të BBC-së, ai tha se i ashtuquajturi “ligj i madh dhe i bukur”, siç e quan Trump, do të rrisë deficitin buxhetor dhe do të minojë punën e DOGE-së.
“Një ligj mund të jetë i madh ose i bukur, por unë nuk besoj se mund të jetë i të dyjave”, tha Musk.
Shkurtime masive dhe konflikte brenda administratës
Musk premtoi shkurtime prej të paktën 2 trilionë dollarësh në fillim të mandatit të tij, por përfundimisht e përgjysmoi këtë shifër dhe më pas e uli më tej në 150 miliardë dollarë.
Është vlerësuar se afërsisht 260,000 nga gjithsej 2.3 milion punonjës në pjesën civile të qeverisë federale kanë humbur vendet e tyre të punës ose kanë pranuar pagesë për ndërprerjen e punës për shkak të DOGE. Në disa raste, gjyqtarët federalë kanë ndaluar shkurtimet masive të vendeve të punës dhe kanë urdhëruar punonjësit të kthehen në punë.
Pati edhe gabime, dhe midis të pushuarve nga puna ishin punëtorë në programin bërthamor amerikan.
Në prill, Musk njoftoi tërheqjen e tij nga roli qeveritar dhe rikthimin në drejtimin e kompanive të tij, duke thënë se DOGE po bëhej gjithnjë e më shumë një kokë turku për të gjitha problemet.
“Të gjithë po fajësojnë DOGE-n për gjithçka tani,” i tha ai Washington Post përpara lëshimit të SpaceX në Teksas. “Diçka e keqe ndodh kudo, dhe ne akuzohemi edhe pse nuk kemi të bëjmë fare me të.”
Rënia e Teslës dhe presionet politike
Gjatë angazhimit politik të Musk, Tesla regjistroi një rënie të shitjeve prej 13% në tremujorin e parë, më e madhja në historinë e saj. Aksionet kanë rënë deri në 45%, dhe megjithëse janë rikuperuar pjesërisht, ato janë ende rreth 10% nën vlerën e tyre fillestare.
Musk u tha aksionarëve se do t’i “kushtonte dukshëm më pak kohë DOGE-t” në të ardhmen dhe se po kthehej të drejtonte Tesla-n. Ai njoftoi gjithashtu se do të zvogëlonte donacionet politike, pasi shpenzoi gati 300 milionë dollarë për fushatën e Trump dhe kandidatët e tjerë republikanë vitin e kaluar.
Tesla ka qenë shënjestër e protestave dhe vandalizmit, duke bërë që Prokurorja e Përgjithshme e SHBA-së Pam Bondi të paralajmërojë se incidente të tilla do të trajtohen si “terrorizëm vendas”.
Të martën, Musk tha në forumin ekonomik në Doha se do të qëndrojë në krye të Teslës për të paktën pesë vjet të tjera.
