Vetëm pak metra larg murit të burgut të Dubravës, kanë filluar gërmimet për gjetjen e mbetjeve mortore të një personi të zhdukur menjëherë pas përfundimit të luftës në Kosovë. Në këtë zonë, e njohur për një nga krimet më të rënda të kryera kundër të burgosurve shqiptarë gjatë luftës, ekipet e Institutit të Mjekësisë Ligjore kanë nisur punimet në terren pas një dëshmie që mund ta zbardhë fatin e një viktime të zhdukur për më shumë se dy dekada.
Në këtë zonë ekipet e mjekisë ligjore të enjten kanë nisur gërmimet pasi që një dëshmitar ka ofruar informacione kyçe për këtë rast. Në afërsi të hapësirës së burgut të Dubravës, të enjten kanë nisur gërmimet nga ekipet e Institutit të Mjekësisë Ligjore në kërkim të mbetjeve mortore. Dëshmitari, menjëherë pas luftës e kishte gjetur personin në zonën malore afër burgut të Dubravës dhe e kishte varrosur.
Prokurori i Prokurorisë Speciale, Ilir Morina, theksoi se hetimet janë ndërmarrë pas identifikimit të dëshmitarit nga Policia e Kosovës.
“Dëshmitari na tregoi vendin ku e ka gjetur, pa mbështetjen e askujt me fuqi vetanake e ka vendos dhe varros në zonën ku aktualisht ekipet janë duke punuar dhe gjurmuar. Informacionet nga dëshmitari janë verifikuar, kemi bërë përpjekje maksimale me komisionin për persona të zhdukur dhe organizatat tjera ndërkombëtare dhe këto informacione po i shkëmbejmë edhe me organizata të tjera nëse mund të vijmë deri te identifikimi i viktimës”, tha Morina.
Kushtrim Gara nga Komisioni Qeveritar për Personat e Zhdukur, tha se ky është lokacioni i dhjetë që po gërmohet këtë vit.
“Në momentin e përmirësimit të kushteve të motit do të fillojmë me gërmime në një lokacion në Komunën e Malishevës, për të vazhduar me një rast në Komunën e Prishtinës në kuptim të keqidentifikimit të mundshëm për t’u rikthyer në lokacionin në Obrançë ku janë gjetur mbetjet mortore të një personi apo të një individi minimumi. Pastaj vazhdojmë me gërmime në lagjen Arbëria të Prishtinës, ku javë më parë janë gjetur dhe varrosur mbetjet mortore të tre personave, po ashtu jemi kthyer në Istog në dy lokacione, përkatësisht në varrezat e qytetit të Istogut ku të paktën janë gjetur mbetjet mortore të dy individëve. Po flas për numrin minimal sepse do të jetë procedura e ekzaminimit që do ta përcaktojë numrin e individëve dhe indentifikimin e personave për të vazhduar pastaj në një lokacion mes komunës së Skenderajt dhe Istogut, përkatësisht në Syriganë dhe një lokacion në Komunën e Zubin Potokut dhe sot jemi rikthyer në lokacionin e Dubravës”, tha Gara.
Gërmimet në këtë lokacion do të vazhdojnë. Në Burgun e Dubravës është kryer një ndër masakrat më të mëdha në Kosovë dhe ende nuk ka një numër të saktë të personave të zhdukur.
Prokuroria ka identifikuar 680 dëshmitarë, 430 prej tyre janë intervistuar. Derisa hetimet janë të bazuara në përgjegjësinë komanduese nga drejtori i burgut të Dubravës, policisë, ushtrisë dhe strukturave tjera të asaj kohe.
Pas disa ditësh, një nga aktakuzat për përgjegjësi individuale do të marrë verdiktin final, ndaj Gavrillo Millosavleviqit. E një aktakuzë tjerët është ngritur kundër Momir Pantiqit, i cili akuzohet për 16 pika, e një ndër to është edhe burgu i Dubravës.
