Kryesuesi i Bordit të Zyrës së Rregullatorit për Energji (ZRRE), Ymer Fejzullahu, dje në Athinë ka kryesuar mbledhjen e 61-të të Bordit të Komunitetit të Energjisë.
Takimi, i cili u mbajt në kryeqytetin grek, ka treguar ZRRE-ja, mblodhi bashkë kryesuesit e bordeve rregullatore nga vendet anëtare, të cilët, thuhet se prezantuan të arriturat për gjysmën e parë të vitit 2025.
“Gjatë diskutimeve është theksuar rëndësia e bashkëpunimit të ndërsjellë dhe shkëmbimit të përvojave për të përmbushur objektivat e përbashkëta drejt një tregu të qëndrueshëm, të integruar dhe të sigurt. Në takim u diskutua edhe bashkimi i tregjeve mes shteteve dhe kërkesa për harmonizimi i legjislacionit dhe rregullave qe e mundësojnë bashkimin e tregjeve te energjisë elektrike”, bëhet e ditur në njoftimin e ZRRE-së.
Pjesë e rendit të ditës, sipas Zyrës së Rregullatorit kanë qenë edhe përgatitjet për mbledhjen e ardhshme të Bordit të Komunitetit të Energjisë, ku janë diskutuar temat prioritare që pritet të adresohen, përfshirë përparimin drejt tranzicionit të gjelbër, forcimin e kuadrit rregullator dhe integrimin e mëtejshëm të tregjeve të energjisë në rajon.
ZRRE-ja e ka quajtur konfirmim të rolit aktiv të tyre në nxitjen e bashkëpunimit rajonal dhe përkushtimit ndaj zbatimit të standardeve evropiane në sektorin e energjisë, kryesimin e këtij takimi nga Zejnullahu.
