Sot në hollin e ekspozitave të Bibliotekës Kombëtare të Kosovës u hap ekspozita e përbashkët me titull “Nga lufta në liri: Çlirimi i Kosovës në dokumente, kujtime dhe medie”, organizuar me rastin e shënimit të Ditës së Çlirimit të Kosovës më 12 qershor.
Ekspozita është realizuar nën përkujdesjen e Ministrisë së Kulturës, Rinisë dhe Sportit (MKRS), në bashkëpunim me katër institucione: Bibliotekën Kombëtare të Kosovës (BKK), Agjencinë Shtetërore të Arkivave të Kosovës (AShAK), Institutin për Krime të Kryera gjatë Luftës në Kosovë (IKKL) dhe Muzeun Kombëtar të Kosovës (MKK).
Sipas njoftimit, hapjen e ekspozitës e bëri me një fjalë rasti drejtoresha e BKK-së, Blerina Gaxha-Rugova, e cila tha se “kjo ekspozitë na kujton luftën, lirinë dhe respektin që kemi për ndihmën që i kanë dhënë të gjithë aleatët Kosovës për çlirimin e saj”.
Po me nga fjalë përshëndetëse u paraqitën edhe drejtuesit e institucioneve bashkorganizatore, Atdhe Hetemi, drejtor i përgjithshëm i IKKL-së, Vjollca Aliu, drejtoreshë e Muzeut Kombëtar të Kosovës, Mehmed Xhemajli, drejtor ekzekutiv i AShAK-ut.
Në ekspozitë të pranishëm ishin kryeministri në detyrë i Kosovës, Albin Kurti, përfaqësues të disa misioneve diplomatike në Kosovë, përfshirë ambasadorë dhe diplomatë të huaj.
Drejtuesit e institucioneve thanë se kjo ekspozitë paraqet një homazh të denjë për luftën e Ushtrisë Çlirimtare të Kosovës (UÇK) dhe për përpjekjet e popullit të Kosovës për liri, dinjitet dhe shtetësi.
Të gjithë folësit gjatë hapjes së ekspozitës thanë se ndihma dhe përkrahja e miqve ndërkombëtarë – veçanërisht e Shteteve të Bashkuara të Amerikës, vendeve të NATO-s dhe aleatëve të tjerë demokratikë – ishte vendimtare për ndalimin e spastrimit etnik dhe për çlirimin e Kosovës. Kontributi i bashkësisë ndërkombëtare, u tha, mbetet i pashlyeshëm në ndërgjegjen kolektive të popullit të Kosovës dhe përbën një faqe të ndritur të historisë sonë të re.
“Në kuadër të ekspozitës u paraqitën: Libra, monografi dhe periodikë nga fondi i Bibliotekës Kombëtare të Kosovës; dokumente, fotografi dhe materiale audiovizive nga arkiva e Institutit për Krime të Kryera gjatë Luftës në Kosovë; dokumente historike nga fondet e Agjencisë Shtetërore të Arkivave të Kosovës; eksponate muzeale nga koleksioni i Muzeut Kombëtar të Kosovës”, thuhet në njoftimin e ASHAK.
Për të gjithë të interesuarit ekspozita do të jetë e hapur deri në fund të muajit në ambientet e Bibliotekës Kombëtare të Kosovës.
