Shkruan: Agim ALIÇKAJ
Me ftesë të Universitetit Kombëtar i Tetovës, delegacioni i LQSHA-së, i udhëhequr nga veprimtarët legjendarë për të drejtat kombëtare dhe të njeriut të shqiptarëve në Washington, Joe DioGuardi dhe Shirley Cloyes DioGuardi, filloi vizitën e tij në Maqedoninë Iliriane.
Vizita filloi me një takim në Ambasadën Amerikane, ku u diskutuan tema të ndryshme me rëndësi për popullin shqiptar në Maqedoni dhe bashkëjetesën me popullin maqedonas në harmoni, barazi dhe tolerancë ndaj njëri-tjetrit.
Fatkeqësisht, asgjë nuk shkon lehtë në shtetin e emëruar Maqedoni e Veriut. Maqedonët të krijuar si komb i vogël në kohën e re të ish Jugosllavisë, të frikësuar nga dominimi, vazhdojnë me përpjekje për të dominuar popullin autokton shqiptar dhe për të përvehtësuar historinë e tij duke filluar që nga emri ilir Maqedoni.
Aleksandri apo Leka i madh i Maqedonisë del hero i maqedonëve të sodit, me bustet dhe emrin e tij kudo dhe të babait të tij Filipit. Shëntorja shqiptare nëna Tereze, me emër të lindjes Gonxhe Bojaxhiu, emërohet gati kudo “Majka Teresa”. Vendi ku lindi nënë Tereza i shënuar simbolikisht me disa pllaka, ndërsa muzeumi “Majka Teresa” në një vend krejt tjetër.
Qyteti i Shkupit është i mbushur me monumente për shumë heronj të tjerë si Qirili dhe Metodi, shumica e të cilëve janë me prejardhje ortodokse shqiptare. Ky qytet ka sharmin e vet, por me pak ose aspak mbishkrime në shqip, nuk lë përshtypjen e barazisë midis maqedonasve dhe shqiptarëve.
Kuptohet që faji kryesor për pabarazinë në Maqedoninë e Veriut i takon shovinizmit maqedonas, por numri i madh i partive shqiptare, përçarja për kojtje dhe interesa personale i bën ato bashkëfajtore. Megjithatë, në të gjitha kontaktet me popullin vendas maqedonas dhe shqiptar gjatë dy ditëve, kishte mirësjellje dhe nuk vihej re ndonjë urrejtje e thellë kombëtare. Kjo të bën të besosh se popujt janë gati për bashkëjetesë, por politikanët janë ata që e që po e dëmtojnë atë.
