Komuna e Prishtinës ka arritur marrëveshje me ndërmarrjen publike “Pastrimi”, pas një muaji të hyrjes në grevë të punëtorëve të kësaj të fundit.
“Ju njoftojmë se është arritur marrëveshje mes Komunës së Prishtinës dhe Këshillit Grevist të Ndërmarrjes ‘Pastrimi’ për ndërprerjen e grevës së punëtorëve para objektit të Komunës”, thuhet në njoftimin e komunës.
Në ndërkohë, dy institucionet janë duke mbajtur konferencë për media duke filluar prej orës 16:30.
Punëtorët e “Pastrimit” kishin mbajtur grevë, duke kërkuar që komuna ta shlyejë borxhin që ka ndaj kësaj ndërmarrjeje, e cila është jetike për pagat e rreth 900 punëtorëve.
Sindikata kishte thënë se, ndonëse është nënshkruar një kontratë shtesë për shërbime sipërfaqësore në vlerë prej 1.5 milionë euro, kjo nuk është zgjidhje e kërkesave të tyre thelbësore dhe nuk e ndalon përshkallëzimin e grevës.
Gjithashtu, ata kishin kërkuar zgjidhjen e statusit të ndërmarrjes, përmes një marrëveshjeje të qëndrueshme dhe afatgjatë që garanton mbështetje institucionale dhe financiare.
Kërkesë tjetër e tyre ishte ndërprerja e kontratave me operatorë privatë që ofrojnë shërbime paralele, të cilat, sipas tyre, po e dëmtojnë funksionimin dhe të ardhurat e ndërmarrjes publike.
