“Sot futbolli ynë ka humbur një prej figurave të shquara të historisë së tij”, ka thënë kryetari i Federatës së Futbollit të Kosovës, Agim Ademi, duke folur për ndarjen nga jeta të Ejup Mehmeti – Kapitit.
Trajneri dhe ish-futbollisti i njohur kosovar ka vdekur sot. Ai njihej si një emër i përkushtuar në zhvillimin e futbollit dhe edukimin e gjeneratave të reja në këtë sport.
Ademi e ka vlerësuar figurën e Kapitit, duke e kujtuar si mik, bashkëlojtar dhe trajner. “Me pikëllim të madh e mora lajmin për ndarjen nga jeta të mikut, bashkëlojtarit dhe më pas trajnerit tim, Ejup Mehmeti – Kapiti. Ishte privilegj për mua të luaja përkrah Ejupit e më vonë ta kisha edhe si trajner. Ai ishte ndër trajnerët që punoi me përkushtim maksimal dhe udhëzoi shumë të rinj në rrugën e futbollit profesionist. Ejupi ishte më shumë se një futbollist dhe trajner. Ishte njeri i dijes, i përkushtuar ndaj futbollit dhe zhvillimit të të rinjve. Dashuria e madhe për futbollin bëri që ai të kryejë magjistraturën në Universitetin e Sarajevës për futboll si dhe të jetë me licencë Pro të UEFA-s, duke qenë edhe pjesë e stafit të klubit të Bundesligës, Hamburg. Krahas futbollit ai dha kontribut të çmuar për vendin, pasi ishte veprimtar i madh i çështjes kombëtare. Kontributi i tij në KF Prishtina dhe në futbollin e Kosovës në përgjithësi nuk do të harrohet. Ai do të kujtohet gjithmonë për qetësinë, urtësinë dhe dashurinë e pakufishme për futbollin. Lamtumirë, miku im!”, ka shkruar Ademi “Faleminderit për gjithçka i ke dhënë këtij sporti dhe neve që patëm fatin të të njohim nga afër”.
