Partia Demokratike e Kosovës ka kujtuar sot Ditën Ndërkombëtare për Eliminimin e Dhunës Seksuale në Konflikt, duke theksuar se qëndron pranë viktimave të dhunës seksuale të kryer nga forcat paramilitare e ushtarake serbe gjatë luftës në Kosovë.
“Në Ditën Ndërkombëtare për Eliminimin e Dhunës Seksuale në Konflikt, jemi pranë të gjithë atyre viktimave të kësaj forme të dhunës, të përjetuar nga forcat paramilitare e ushtarake të Serbisë gjatë luftës së fundit në Kosovë”, thuhet në deklaratën e PDK-së.
Sipas kësaj partie, kjo ditë është “thirrje për drejtësi, ndërgjegjësim dhe veprim”.
“Është detyra jonë të mbështesim viktimat, të kërkojmë ndëshkim për kryesit e këtyre krimeve dhe të ndërtojmë një botë ku asnjë grua, burrë apo fëmijë të mos jetojë në frikë”, thuhet më tej.
“Kosova nuk harron! Kosova nuk do të reshtë së kërkuari drejtësi!”, përfundon PDK.
