Prej një jave, Naim Murseli, i akuzuar për vrasjen e bashkëshortes së tij, Liridona Ademaj, është shtruar në Klinikën e Psikiatrisë. Këtë e ka konfirmuar për media drejtori i Institutit të Psikiatrisë Forenzike, Shpend Haxhibeqiri i cili ka thënë se i akuzuari Murseli do të qëndrojë në institut deri sa të bëhet ekzaminimi i plotë i tij.
Sot në mëngjes, Murseli nën përcjelljen e Policisë është dërguar në Klinikën e Neurologjisë në QKUK për tu kthyer sërish në Institutin e Psikiatrisë Forenzike.
Në fillimin e këtij muaji, trupi gjykues pati miratuar kërkesën e mbrojtjes së të akuzuarit për vrasjen e gruas, Naim Murselit që t’i bëhet ekzaminimi psikiatrik.
Teuta Zhinipitoku që është avokate e të akuzuarit e kishte arsyetuar kërkesën duke thënë se klienti i saj ka shpërfaqur gjendje psikiatrike të paqëndrueshme, për çka disa ditë pas Themelorja në Prishtinë lëshoi urdhëresë që Instituti ta bëjë ekzaminimin psikiatrik.
“Referuar kërkesës tuaj për informata ju njoftojmë se Gjykata Themelore në Prishtinë – Departamenti për Krime të Rënda me datë 04 Qershor 2025 ka aprovuar kërkesën e mbrojtëses të të akuzuarit N.M. për lëshimin e Urdhrit për Ekzaminimin Psikiatrik për të njëjtin. Me datë 09.06.2025 trupi gjykues në këtë çështje penale ka lëshuar Urdhëresë përmes së cilës është urdhëruar Instituti i Psikiatrisë Forenzike në Prishtinë të bëjë Ekzaminimin Psikiatrik për të akuzuarin N.M”, ka thënë për RTKlive, Mirlinda Gashi, udhëheqëse e Zyrës për Media në Gjykatën Themelore në Prishtinë.
