Emma Heming Willis, bashkëshortja e aktorit të famshëm Bruce Willis, festoi ditëlindjen e saj të 47-të më 18 qershor. Edhe pse bashkëshorti i saj nuk u shfaq në asnjë foto nga festimi, Emma ndau disa momente të ngrohta me anëtarët e familjes së tyre të zgjeruar.Në fotot e publikuara, Emma shihet duke pozuar me Rumer Willis, vajzën më të madhe të Bruce nga martesa e tij e parë, si dhe me ish-gruan e aktorit, Demi Moore.
Vajzat e Emmës, Mabel (13) dhe Evelyn (11), të cilat i ka me Bruce, dhe vajza dyvjeçare e Rumer, Louetta Isley, gjithashtu iu bashkuan festimit të ditëlindjes. Në foton e parë, Demi Moore mban Louettën e vogël në prehër.
Emma përdori rrjetet sociale për të falënderuar të gjithë ata që ia bënë ditën më të bukur.
“Kam ndjerë një sasi të jashtëzakonshme dashurie për ditëlindjen time në javët e fundit – nga Bruce, vajzat tona, nëna ime, familja dhe miqtë e dashur. E ndiej mbështetjen e tyre në një mënyrë që është e vështirë të shprehet me fjalë. Faleminderit të gjithëve që më kanë dërguar urime për ditëlindje. Jam vërtet e prekur dhe mirënjohëse. Ka qenë një ditë e mrekullueshme”, shkroi Emma.
Bruce Willis dhe Demi Moore u martuan në vitin 1987 dhe u divorcuan në vitin 2000. Gjatë martesës së tyre, ata patën tre vajza – Rumer, Scout dhe Tallulah. Edhe pas divorcit, ata mbetën të afërt, duke kaluar shpesh pushimet së bashku dhe duke mbështetur njëri-tjetrin në faza të ndryshme të jetës. Bruce u martua me Emmën në vitin 2009 dhe me kalimin e kohës, ajo dhe Demi zhvilluan një marrëdhënie miqësore.Si kujtesë, Bruce Willis u tërhoq nga karriera e tij si aktor në vitin 2022 pasi u diagnostikua me afazi, dhe një vit më vonë mjekët konfirmuan se ai vuante nga demenca frontotemporale.
