Gjenerallejtënant Bashkim Jashari, Komandanti i Forcës së Sigurisë së Kosovës (FSK), është pritur në Shtetet e Bashkuara të Amerikës nga Komandanti i Qendrës së Trajnimit të Përbashkët për Gatishmëri (JRTC), Gjeneral Brigade Jason A. Curl, gjatë përmbylljes së vizitës së tij në SHBA.
FSK njofton se në kuadër të vizitës, Gjeneral Jashari ka takuar gjithashtu pjesëtarët e rotacionit të trajnimit 25-08 për gatishmëri dhe dislokim në Ft. Johnson, Louisiana. Komandanti i JRTC, Gjeneral Curl, ka njoftuar Gjeneral Jasharin për performancën e lartë të trupave të FSK-së në krahasim me trupat partnere amerikane, duke theksuar vlerësimet pozitive nga stafi i qendrës për përgatitjen e trajnimit dhe dislokimin e këtij rotacioni.
Nga ana e tij, Gjeneral Jashari ka falënderuar Gjeneral Brigade Curl për mbështetjen e ofruar në trajnimin e trupave të FSK-së dhe ka vlerësuar nivelin e lartë të trajnimit që ofron kjo qendër.
Gjeneral Jashari ka vizituar gjithashtu poligonet dhe hapësirat e ndryshme të trajnimeve, ku është njohur nga afër me mundësitë dhe kapacitetet që ofron JRTC për trajnimin dhe përgatitjen e trupave për gatishmëri dhe dislokim.
