Agjencia për Informim dhe Privatësi (AIP) është zgjedhur anëtare e Komitetit Drejtues të Rrjetit Evropian për Transparencë dhe Qasje në Informata (ENTRI), gjatë Konferencës Ndërkombëtare të Komisionerëve për të Drejtën e Informimit (ICIC), e mbajtur më 24 qershor 2025 në Berlin.
“Rrjeti ENTRI u krijua pas një takimi fillestar njoftues me pjesëmarrjen e të gjitha shteteve evropiane, ku AIP, përmes Komisioneres Krenare Sogojeva-Dermaku, shprehu interesimin për t’u bërë pjesë aktive e këtij Rrjeti duke kandiduar për Komitetin Drejtues. Në sesionin e dytë të Konferencës, shtetet anëtare të ICIC, me votim unanim, përzgjodhën Kosovën, Portugalinë, Spanjën, Francën dhe Skocinë si anëtare të Komitetit Drejtues, ndërsa Gjermania u zgjodh Kryesuese e këtij Rrjeti”, thuhet në njoftimin që ka shpërndarë kjo agjenci për anëtarësimin në këtë Komitet.
Ky zhvillim, thotë AIP, shënon një arritje të rëndësishme në avancimin e pozitës ndërkombëtare të Republikës së Kosovës në fushën e transparencës dhe të drejtës për qasje në dokumente publike.
“Rrjeti Evropian për Transparencë dhe Qasje në Informata (ENTRI) është themeluar si platformë bashkëpunimi ndërmjet institucioneve evropiane që mbrojnë dhe promovojnë të drejtën e qasjes në informata publike. Ndërsa, Komiteti Drejtues ka për mandat të koordinojë veprimtaritë e Rrjetit, të mbështesë përgatitjen dhe miratimin e rezolutave të Asamblesë, të menaxhojë proceset e anëtarësimit dhe të ushtrojë funksione të tjera qeverisëse dhe administrative”, shpjegon tutje njoftimi.
Përmes këtij angazhimi të ri, Agjencia për Informim dhe Privatësi thotë se do të kontribuojë në promovimin e transparencës në qeverisje, shkëmbimin e praktikave të mira dhe forcimin e bashkëpunimit ndërkombëtar në të drejtën e qasjes në dokumente publike në nivel evropian.
“Në kuadër të përpjekjeve të saj për bashkëpunim ndërkombëtar, AIP vijon të ushtrojë rol aktiv edhe si Koordinatore e Grupit Punues për Integritet të Informimit (International Information Ëorking Group – IIËG), i cili përfshin më shumë se dhjetë shtete anëtare nga mbarë bota, me ç’rast në sesionet e mbyllura të Konferencës, përfaqësues të AIP-së prezantuan arritjet e deritanishme të këtij grupi punues. Ky angazhim përforcon më tej përkushtimin e Republikës së Kosovës për të respektuar dhe avancuar standardet ndërkombëtare të transparencës dhe llogaridhënies”, thotë Agjencia për Informim e Privatësi.
