Deputeti gjerman Johannes Volkmann ka bërë thirrje që Kosova të njihet nga të gjitha shtetet e Bashkimit Evropian dhe të anëtarësohet në Këshillin e Evropës (KiE).
Në një video të ndarë nga ambasadori i Kosovës në Gjermani, Faruk Ajeti, Volkmann shfaqet duke mbajtur fjalimin e tij të parë në Bundestag, ku shpreh mbështetje të fortë për Kosovën, në kuadër të debatit për zgjatjen e mandatit të trupave gjermane në kuadër të KFOR-it.
‘Faleminderit Johannes! Ndërsa fjalimi i fundit i Helmut Kohl në Bundestag ishte më 1 korrik 1999, nipi i tij, Johannes, debutoi dje me një mbështetje të fuqishme për Kosovën,’ shkroi Ajeti në Facebook.
Deputeti Volkmann, nipi i ish-kancelarit Helmut Kohl, një nga mbështetësit historikë të pavarësisë së Kosovës, kërkoi respektimin e vendimit të Gjykatës Ndërkombëtare të Drejtësisë, që legjitimoi shpalljen e pavarësisë së Kosovës.
Në fjalimin e tij, Volkmann i bëri thirrje vendeve anëtare të BE-së që ende nuk e kanë njohur Kosovën, që të ndërmarrin hapa konkretë drejt njohjes së saj, duke e cilësuar këtë një domosdoshmëri për stabilitetin rajonal dhe për integrimin e mëtejshëm të Kosovës në institucionet ndërkombëtare.
