Ushtarët polakë të Komandës Rajonale-Lindje, të misionit të KFOR-it të në Kosovë, kanë kryer patrullime përgjatë zonës kufitare në veri të Kosovës.
Sipas këtij misioni të NATO-s në Kosovë, patrullime të tilla luajnë një rol jetësor në sigurimin e një mjedisi të sigurt për të gjitha komunitetet.
“Patrullime të tilla, të kryera në mënyrë të paanshme dhe rutinore, janë thelbësore për të ruajtur një prani të dukshme, për të rritur ndërgjegjësimin për situatën dhe për të mbështetur stabilitetin e përgjithshëm në të gjithë zonën e përgjegjësisë. Ato luajnë një rol jetësor në sigurimin e një mjedisi të sigurt për të gjitha komunitetet në rajon”, thuhet në njoftimin e KFOR-it.
KFOR-i thotë se vazhdon të zbatojë mandatin e tij, bazuar në Rezolutën 1244 të Këshillit të Sigurimit të OKB-së të vitit 1999, për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.
“ KFOR-i punon në koordinim të ngushtë me Policinë e Kosovës dhe Misionin e Sundimit të Ligjit të Bashkimit Evropian në Kosovë (EULEX) në rolet e tyre përkatëse si reagues të sigurisë”, thuhet në njoftimin e këtij misioni.
