Kryeministri në detyrë i Kosovës, Albin Kurti, i cili mori pjesë në vënien e gurit të themelit në dy ura mbi lumin Ibër ka thënë se me këtë akt po tregohet përkushtimin e qeverisë që ndërmjet veriut e jugut të ketë sa më shumë komunikim, qarkullim, bashkëpunim e shkëmbime.
Kurti tha se ka kaluar koha e barrikadave dhe se tani është koha e bashkëpunimit, qarkullimit të lirë, mallrave, shërbimeve dhe kapitalit.
I pyetur nëse do të marrë pjesë në takimin e nesërm të thirrur nga presidentja Osmani, Kurti tha se është për ura të bashkëpunimit.
Ndërkaq i pyetur për deklarimet nga BE për koordinim të ngushtë me partnerët ndërkombëtarë në Kurti tha se të gjitha veprimet e qeverisë janë në përputhje me ligjet dhe për të mirën e qytetarëve të vendit
“Ne gjithçka që bëjmë është në përputhje me planet tona, sipas ligjit dh për të mirën e të gjithë qytetarëve të vendit. Ata të cilët kanë dilema le të na kontaktojnë dhe ne ua shpjegojmë me përpikëri e durim”, tha Kurti.
Ndërkaq për mundësinë e vënieve të barrikadave në pjesën veriore të Mitrovicës, kryeministri në detyrë, Albin Kurti, tha se ka kaluar koha e barrikadave. Tani është koha e bashkëpunimit, e qarkullimit të lirë, e shkëmbimit të mallrave, “prandaj mendoj se këto ura do t’i shfrytëzojnë jo vetëm shqiptarët, por që të gjithë e posaçërisht serbët nga pjesa veriore”.
I pyetur për rreziqet e mundshme gjatë punimeve mbi lumin Ibër, Kurti tha se nga pala kosovare nuk ka rrezik dhe nëse dikush shkel ligjin atëherë duhet të merremi me ata. “Ndaj nuk është mirë të hedhim dyshime të panevojshëm e të spekulojmë për rreziqet që nuk janë aktuale”, deklaroi Kurti.
Ai falënderoi kryetarët e të dy komunave për bashkëpunimin, si dhe Ministrinë për realizimin e këtij projekti që pritet të përfundojë në vjeshtë, me një kosto prej afro 3 milionë euro.
Në vendosjen e gurthemeleve të dy urave të reja mbi lumin i Ibër, përveç, kryeministrit në detyrë i Kosovës, Albin Kurti, morën pjesë edhe kryetari i Komunës së Mitrovicës së veriut, Erden Atiq, nënkryetari i Komunës së Mitrovicës së jugut, Arian Tahiri, ministri në detyrë të Administrimit të Pushtetit Lokal, njëherësh Kryesues i Bordit të Përbashkët të dy komunave, Elbert Krasniqi, dhe ministri në detyrë i Mjedisit, Planifikimit Hapësinor dhe Infrastrukturës, Liburn Aliu, etj.
Vendosja e gurthemeleve të dy urave të reja mbi lumin i Ibër u bë në kuadër të Memorandumit të Bashkëpunimit ndërmjet Ministrisë së Mjedisit, Planifikimit Hapësinor dhe Infrastrukturës dhe komunave të Mitrovicës së Jugut dhe Veriut.
