Deputetja e Lëvizjes Vetëvendosje dhe njëherësh ministrja në detyrë e Drejtësisë, Albulena Haxhiu ka thënë se në bazë të aktgjykimit të Gjykatës Kushtetuese Kuvendi i Republikës së Kosovës duhet të konstituohet brenda afatit prej 30 ditëve, porse në këtë drejtim sipas saj nuk po lëvizin partitë që ishin opozitë në legjislaturën e kaluar.
Ndonëse, sipas Haxhiut, kjo nuk ka qenë çështje që e ka adresuar AAK-ja, PDK-ja e LDK-ja kur e kanë kontestuar Komisionin për votim të fshehtë, Kushtetuesja ka dalë përtej dhe ka caktuar tashmë një afat kohor.
“Kuvendi i Kosovës është dashur të konstituohet po atë ditë, më 15 prill kur është thirrur seanca konstituive, por çka kemi parë gjatë gjithë kësaj kohe është mungesë e vullnetit dhe e përgjegjësisë politike dhe natyrisht edhe publike dhe shkelje e Kushtetutës së Kosovës. Ne kemi qenë të hapur për të marrë pjesë në takimet e presidentja Osmani. Deri tash kemi pasur një takim, e të tjerat do të ndodhin në ditët në vijim. Kryetari ynë, kryeministri Albin Kurti i ka ftuar gjithashtu partitë politike edhe para aktgjykimit për të gjetur një zgjidhje për konstituim, sepse siç e konfirmon edhe aktgjykimi i Kushtetutës nuk është përgjegjësi vetëm e një subjekti politik konstituimi, por e të gjithë deputetëve të kuvendit që të marrin pjesë në votim”, tha ajo.
Por, fatkeqësisht, sipas Haxhiut, “deputetët e opozitës nuk po votojnë”.
“Ne nuk themi asnjëherë se duhet të votojnë për, por nuk po votojnë as për, as kundër dhe as nuk po abstenojnë. Prandaj, ne jemi të gatshëm të marrim pjesë në takimet e radhës të ftuara nga presidentja Osmani. Nuk përjashtojmë asnjëherë që të ketë takime që ftohen edhe nga kryetari Kurti, duke qenë se aktgjykimi i Kushtetueses obligon partinë e parë që të thërras takime me qëllim të konstituimit të Kuvendit të Kosovës, por është e pakuptimtë që të shkosh në takim dhe të mos bësh asnjë lëvizje”,nënvizoi Haxhiu.
Ajo ka thënë se si LVV kanë bërë lëvizje në tejkalim të ngërçit. “Ne kemi bërë një veprim. Ju e dini se kam thënë se me votim të fshehtë do të jetë vetëm një herë emri im në seancë. Pra, vetëm një herë do të votohet për mua dhe nëse nuk i marr të paktën 61 vota nga deputetët e kuvendit unë tërhiqem nga kandidatura. Ka qenë qëndrim i njëanshëm por që është respektuar edhe nga kryetari Kurti edhe nga LLV. Dhe e dyta si kompromis kemi thënë le ta bëjmë një marrëveshje dhe ta rrëzojmë Komisionin për votim të fshehtë, ku edhe LVV merr pjesë në votim, dhe pastaj të merremi vesh për kryetarin dhe nënkryetarët”, shtoi ajo.
Tutje Haxhiu tha se nuk ka kuptim që të thuhet se nuk është emër i përshtatshëm Albulena Haxhiu, e në anën tjetër të thonë se ‘ne këdo e propozojmë për nënkryetarë të kuvendit’.
“Edhe aktgjykimi i Kushtetueses i ka barazuar sepse në fakt zgjedhja e kryetarit dhe nënkryetarëve është në të njëjtin nen, prandaj nuk ka asnjë dallim. Është e rëndësishme që çfarëdo takimi të thirret ne të shkojmë dhe të japim propozime konkrete por nuk ka kuptim të mos lëvizim fare”, tha ajo.
Sa i përket deklaratës së Çitakut nga PDK se janë ftuar për nesër në takim te presidentja Osmani, Haxhiu tha se nuk ka informacione se një ftesë e tillë ka arritur në Lëvizjen Vetëvendosje.
