Kryeprokurori i Prokurorisë Speciale Blerim Isufaj, ka pritur sot Margaret Belof, Alan Edwards, Altina Besimi dhe Blend Zyrapi nga Ambasada e Mbretërisë së Bashkuar në një takim pune.
Siç bëhet e ditur në njoftimin nga Sistemi Prokurorial, takimi u zhvillua në kuadër të projekteve dhe bashkëpunimit të vazhdueshëm ndërmjet Ambasadës Britanike dhe Prokurorisë Speciale.
“Gjatë takimit u vu theksi te rëndësia e themelimit të Ekipeve të Përbashkëta Hetimore, në përputhje me dispozitat e Ligjit të ri për Prokurorinë Speciale, si një hap i rëndësishëm drejt rritjes së efikasitetit në hetimin dhe ndjekjen e veprave të rënda penale”, thuhet në njoftim.
Thuhet se palët theksuan rëndësinë e thellimit të bashkëpunimit, ngritjes së kapaciteteve profesionale dhe forcimit të raporteve ndërinstitucionale në luftën kundër krimit të organizuar dhe korrupsionit.
