Sekretari i Shtetit i SHBA-së, Marco Rubio, dhe Ministri i Jashtëm rus, Sergey Lavrov, zhvilluan një takim dypalësh në kuadër të Forumit Rajonal të ASEAN-it për Sigurinë në Kuala Lumpur.
Sipas agjencive të lajmeve, takimi zgjati 50 minuta. Ndër temat e diskutuara ishin lufta e Rusisë kundër Ukrainës, situata rreth Iranit dhe Sirisë, si dhe çështje që lidhen me normalizimin e punës së misioneve diplomatike të të dy vendeve. Pala ruse ngriti gjithashtu çështjen e rifillimit të fluturimeve direkte midis Rusisë dhe Shteteve të Bashkuara.
Lavrov dhe Rubio “konfirmuan dëshirën e tyre të ndërsjellë për një zgjidhje paqësore të konflikteve, rivendosjen e bashkëpunimit ekonomik dhe humanitar ruso-amerikan dhe promovimin e kontakteve të lira midis shoqërive të të dy vendeve”, tha Ministria e Jashtme ruse në një deklaratë.
Sipas Reuters, Rubio shprehu zhgënjim për mungesën e fleksibilitetit në qëndrimin e Rusisë për zgjidhjen paqësore të konfliktit të armatosur në Ukrainë gjatë takimit të tij me Lavrov. Sipas tij, Shtetet e Bashkuara duan të shohin një “hartë rrugore” për t’i dhënë fund konfliktit. Shtetet e Bashkuara shpresojnë të bindin aleatët e NATO-s të transferojnë disa nga sistemet e tyre të mbrojtjes ajrore Patriot në Ukrainë, tha Rubio. Ai e quajti bisedën e tij me Lavrov “të hapur dhe të rëndësishme”.
Bisedimet e Rubios me Lavrovin erdhën disa orë pasi Rusia nisi një tjetër sulm të madh ndaj Kievit, duke vrarë të paktën dy persona. Më parë, Presidenti i SHBA-së Donald Trump kritikoi ashpër veprimet e udhëheqësit rus Vladimir Putin në lidhje me vazhdimin e armiqësive në Ukrainë, duke njoftuar gjithashtu plane për të rritur ndihmën ushtarake për Kievin.
Rubio dhe Lavrov u takuan për herë të fundit në shkurt në Arabinë Saudite dhe gjithashtu mbajnë kontakte të rregullta telefonike. Pas Malajzisë, Lavrov do të udhëtojë për në Korenë e Veriut, me të cilën Rusia vazhdon të forcojë bashkëpunimin ushtarak.
