Presidentja Vjosa Osmani ka thënë se duhet të ketë pasoja juridike në rast se Kuvendi i Kosovës nuk konstituohet as pas 26 korrikut. Ajo ka thënë se do t’i drejtohen sistemit gjyqësor në rast se nuk ofrojnë zgjidhje politike.
“Unë jam e bindur që nëse ky afat s’respektohet duhet të ketë pasoja juridike. Pasoja juridike nënkupton çka ndodh me institucionet nëse nuk konstituohet deri më 26 korrik. A nënkupton kjo që secili Kuvend i konstituar pas 26 korrikut është kundërkushtetues, a nënkupton kjo se një Kuvend jokushtetues s’mund të zgjedh as qeveri. Sepse nëse vazhdohet edhe pas 26 korrikut, atëherë për çfarë arsye është vendosur ai afat”, ka thënë Osmani.
“Nëse gjatë vikendit s’ka marrëveshje me institucione të konstitutuara, në fillim të javës do t’i drejtohemi Gjykatës. Por ne nuk mund të paragjykojmë sa kohë na merr”, ka shtuar presidentja në konferencë për media.
“Ne vazhdojmë takimet, megjithatë s’është roli i asnjë presidenti të negociojë koalicionet, e kam të ndaluar me kushtetutë. Kushtetuta s’më lejon që ta shpërndaj Kuvendin në këtë fazë dhe ta qojë vendin në zgjedhje. Kjo mund të ndodh nëse shpërndahet Kuvendi, por kjo ndodh vetëm pas konstituimit. Unë mund t’iu bëj thirrje për dëmin që po i bëhet Kosovës e rrezikun që i kanoset Kosovës”, ka thënë Osmani.
