Gjashtë persona, përfshirë tre të mitur, kanë pësuar lëndime trupore pasi një luhatë e vendosur në rrugën “Fatmir Dibra” në Skenderaj është prishur gjatë funksionimit, duke shkaktuar rrëzimin e tyre.
Sipas Policisë së Kosovës, të lënduarit, pesë femra dhe një mashkull, të gjithë shtetas kosovarë, janë dërguar fillimisht në Qendrën Emergjente në Skenderaj, ndërsa tre prej tyre janë transferuar për trajtim të mëtutjeshëm në Spitalin e Përgjithshëm të Mitrovicës.
“Lidhur me rastin, janë intervistuar dy të dyshuar m/k, pronari dhe punëtori i lojërave dhe e me pas me vendim të prokurorit janë liruar në procedurë të rregullt”, thuhet tutje në raportin e Policisë.
Bëhet e ditur se po vazhdojnë hetimet për të përcaktuar shkaqet e saktë të aksidentit dhe nivelin e përgjegjësisë.
