Përsëri ka dështuar përpjekja për konstituimin e Kuvendit të Republikës së Kosovës. Kryesuesi i seancës, Avni Dehari, ndërpreu seancën dhe tha se pret vendimin e Gjykatës Kushtetuese.
103 deputetë ishin të pranishëm, por prapë nuk kaloi votimi për formimin e komisionit të fshehtë parlamentar për zgjedhjen e kryekuvendarit. Nga nesër hyn në fuqi masa e përkohshme e Gjykatës Kushtetuese, e cila ndalon deputetët të marrin çdo vendim apo ndërmarrin veprime pas kalimit të afatit 30-ditor për konstituim, të përcaktuar me aktgjykimin e 26 qershorit. Kjo ndalesë do të jetë në fuqi nga 27 korriku deri më 8 gusht. Gjatë kësaj periudhe pritet një vendim i Kushtetueses për ngërçin politik.
Përpjekje tjetër për konstituimin e Kuvendit të Kosovës| LIVE
(E plotësuar,ora 22:36) Pak kohë së para skadimit të afatit të vënë nga Gjykata Kushtetuese për finalizimin e procesit, Deputetët e zgjedhur të Kuvendit të Kosovës do të mblidhen sonte në një përpjekje tjetër për ta konstituar legjislaturën e nëntë, të dalë nga zgjedhjet parlamentare të mbajtura më 9 shkurt.
Rexhaj: Votimi i hapur apo i mbyllur nuk çon peshë,
Deputeti i VV-së, Arbër Rexhaj, para seancës së 53-të konstituive, ka thënë se është e padrejtë ajo që po iu bëhet qytetarëve dhe ka shtuar se votimi i hapur apo i mbyllur nuk bën ndryshim të madh.
“Ne kemi ardhur këtu me votu. Kur më vonë të pyesni nëse ka diçka të re, tash kemi mbledhje të grupit parlamentar dhe do ta diskutojmë. Është e padrejtë kjo që po ia bëjmë qytetarit. Votimi i hapur, i mbyllur, nuk bën peshë. Prej fillimit ka ekzistuar ideja e opozitës që ta bllokojë Kuvendin,” ka thënë Rexhaj.
Limaj: Fatkeqësisht nuk ka marrëveshje
Kryetari i Nismës Socialdemokrate, Fatmir Limaj, ka thënë se edhe në seancën e sontme nuk pritet të ketë rezultat tjetër, pasi nuk ka marrëveshje të tij me kryertarin e LVV-së, Albin Kurti.
“Fatkeqësisht nuk ka marrëveshje”, u shpreh Limaj, duke shtuar se tani duhet pritur vendimi i Gjykatës Kushtetuese.
Ai ka treguar se pas seancës ka pasur takim me presidenten, ku kanë shkëmbyer mendime dhe presidentja u interesua për zhvillimet e fundit.
“Me presidenten kemi pasur takim dhe thjesht kemi shkëmbyer mendimet pas seancës. Presidentja u interesua për zhvillimet, nuk ka asgjë më tepër.”
“Gjykata Kushtetuese ka pranuar kërkesa nga deputetët për të gjetur një zgjidhje politike, dhe tash 30-ditëshi nuk është konsumuar. Më 26 qershor ka hyrë në fuqi, sot jemi në ditën e fundit, por deputetët e Kosovës nuk kanë pasur rastin të votojnë. Si të tillë, vlerësojmë që afati nuk është konsumuar”, tha Limaj.
Haradinaj: Nuk po shihet që ka vullnet, pres zgjedhje
Deputeti i AAK-së, Daut Haradinaj, ka thënë se janë të gatshëm për çdo lloj kompromisi, me qëllim që të dalin nga kjo situatë. Kërkesa e vetme e tyre ka qenë që të hapet votimi dhe të ndryshohet kandidati.
Megjithatë, Haradinaj tha se më shumë po duket se do të ketë zgjedhje sesa një zgjidhje. “Jemi të gatshëm për çdo lloj kompromisi, vetëm që të dalim nga kjo situatë. E vetmja kërkesë ka qenë që të hapet votimi dhe të ndryshohet kandidatja. Më shumë po e shoh që do të kemi zgjedhje sesa një zgjidhje”, tha ai.
Berisha: Nuk duhet të jem vetëm unë i përgjegjshëm.
Deputeti i AAK-së, Bekë Berisha, ka deklaruar se nuk mund të bëhet vetëm ai i përgjegjshëm për të mundësuar konstituimin e Kuvendit, duke theksuar se situata është bërë “e bajatshme” dhe mund të zgjidhet nga kryeministri Albin Kurti nëse ka vullnet politik.
“Votën e kam treguar qysh e jap, me votim të hapur, ashtu si edhe shumë deputetë të tjerë. Nuk lejoj të keqpërdoret as sinqeriteti im, as vota ime. Nuk duhet të jem vetëm unë i përgjegjshëm. Duhet të reflektohet. Ky problem mund të zgjidhet nga Albin Kurti që tash, por ai nuk po do”, ka thënë Berisha.
Zemaj: Ka presion te deputetë
Deputeti i Lidhjes Demokratike të Kosovës (LDK), Armend Zemaj, ka deklaruar se kanë dëgjuar për presion ndaj deputetëve të komuniteteve minoritare joserbe në përpjekje për të siguruar votat e nevojshme për konstituimin e Kuvendit në përpjekjen e 54-t që do të mbahet në orën 22:00.
“Ka presion te deputetë, sidomos te grupet minoritare. Këtë e kemi dëgjuar nga kolegët tanë të komuniteteve joserbe, të cilët thonë se po u bëhet presion që të japin votën shtesë në bazë të interesave dhe kërkesave që kanë paraqitur. Kjo nuk i kontribuon as demokracisë dhe as stabilitetit institucional”, ka thënë Zemaj para hyrjes në Kuvend.
Çitaku: Kosova dhe e ardhmja e saj është shumë më e rëndësishme se karriera e Albin Kurtit
Deputetja e PDK-së, Vlora Çitaku, para seancës së 53-të konstituive të Kuvendit, ka deklaruar se institucionet e Kosovës janë peng i kokëfortësisë së kryeministrit në detyrë, Albin Kurti.
“Institucionet e Kosovës janë peng i kokëfortësisë së Albin Kurtit. Kemi ofruar kompromise tona, por fatkeqësisht e kemi një kryetar partie që e refuzon idenë e bashkëpunimi”.
“Kosova dhe e ardhmja e saj është shumë më e rëndësishme se karriera e Albin Kurtit dhe Albulena Haxhiut”, ka thënë ajo.
Deputetja më e re e Kuvendit të Kosovës, Sala Jashari nga radhët e PDK-së, ka deklaruar se asnjë i ri apo e re nuk do të donte ta niste punën në këtë mënyrë.
Ajo shpreson se Vetëvendosje ka reflektuar dhe nuk do ta lejojë që procesi të zvarritet edhe më tej, pasi qytetarët kanë nevojë për lidership të vërtetë.
“Asnjë i ri apo e re nuk do të donte ta niste punën në këtë mënyrë. Shpresoj që Vetëvendosje ka reflektuar dhe të mos lejojë që ky proces të zvarritet edhe më tej, sepse qytetarët kanë nevojë për lidership të vërtetë. Inatet nuk duhet të jenë parësore. Në çdo tentativë kemi pritur diçka
Sveçla pret që sonte të konstituohet Kuvend
Ministri në detyrë i Punëve të Brendshme, Xhelal Sveçla pret që sonte të konstituohet kuvendi.Kështu u shpreh ai para mediave teksa ka hyrë në objektin e Kuvendit të Kosovës.
