Kryetari i Partisë Demokratike të Kosovës, Memli Krasniqi, ka shkruar pas publikimit të raportit nga instituti GAP, “Indeksi i Transparencës Buxhetore të Komunave 2024”. Kreu i PDK-së komunat ku ata i drejtojnë i ka quajtur kampione absolute të transparencës.
“Nga tetë komunat me shumicë shqiptare që udhëhiqen nga PDK, pesë prej tyre, Kaçaniku, Mitrovica e Jugut, Prizreni, Skenderaj dhe Vushtrria, kanë arritur vlerësimin maksimal prej 100 pikësh nga Instituti GAP për transparencën buxhetore në vitin 2024. Drenasi dhe Hani i Elezit gjithashtu janë ndër më të mirat, me nga 95 pikë secila. Në total, komunat tona janë kampione absolute të transparencës dhe të menaxhimit të parasë publike”, ka shkruar Krasniqi.
Ai ka thënë se ky është standardi që PDK sjell në qeverisje, kudo ku merr përgjegjësi.
“Më 12 tetor, do të vazhdojmë punën për fitoren edhe në komuna të tjera, që sa më shumë qytetarëve t’u shërbejmë me punë, transparencë, zhvillim dhe shumë dashuri’, ka shkruar Krasniqi.
