Inspektorati Policor i Kosovës (IPK) ka publikuar raportin e inspektimit të jashtëzakonshëm me temë “Përdorimi i teknologjisë për matjen e shpejtësisë së lëvizjes së mjeteve në trafik”, në të cilin janë evidentuar një sërë mospërputhjesh dhe dobësish në mënyrën e shqiptimit të gjobave për kundërvajtje në trafik.
Inspektimi është zhvilluar me kërkesë të Kryeshefit Ekzekutiv të IPK-së, pas shqetësimeve se zyrtarët policorë nuk po i gjobisin gjithmonë drejtuesit e mjeteve në përputhje me të dhënat e regjistruara nga pajisjet digjitale për matjen e shpejtësisë. Sipas IPK-së, gjetjet e inspektimit ngrisin dyshime për mundësi abuzimi gjatë kryerjes së detyrës zyrtare.
Katër lloje mospërputhjesh të identifikuara:
Nga analiza e 84 mostrave/gjobave janë vërejtur këto mospërputhje:
Në 55 raste, shpejtësia e shënuar në gjobë ka qenë më e ulët se ajo e regjistruar në radar.
Në 23 raste, shpejtësia e kufizuar në radar nuk përputhet me atë të shënuar në gjobë.
Në 3 raste, lloji i shkeljes i dokumentuar në gjobë ka qenë i ndryshëm nga ai i matur nga pajisja.
Në 3 raste të tjera, gjoba është shqiptuar në bazë të paragrafit të gabuar të ligjit.
Këto mospërputhje, sipas raportit, krijojnë hapësirë për praktika të dëmshme dhe ndikojnë në besueshmërinë e zbatimit të ligjit në trafik.
“IPK në kuadër të Raportit ka dhënë shtatë (7) rekomandime, që kanë të bëjnë me nevojën e nxjerrjes së një udhëzuesi lidhur me përdorimin e pajisjeve për matjen e shpejtësisë së lëvizjes, mbajtjen e një trajnimi shtesë për të pajisur personelin me njohuri të mjaftueshme, ushtrimit të kontrolleve në drejtim të eliminimit të dobësive sa i përket vendosjes së të dhënave në pajisjet e matjes, ushtrimit të kontrolleve në drejtim të eliminimit të praktikave të dëmshme gjatë shqiptimit të gjobave për kundërvajtje, përdorimit efektiv të automjeteve me pajisje inteligjente, monitorimit të procesit të shkarkimit dhe ruajtjes së materialeve të regjistruara nga pajisjet, aplikimit të praktikës së printimit të kundërvajtjeve, etj”, thuhet në njoftimin e IPK-së.
Lidhur me rezultatin e inspektimit duke përfshirë edhe rekomandimet e dhëna, të gjithë të interesuarit mund të kenë qasje në Raportin e plotë të inspektimit, i cili është i publikuar në faqen zyrtare të IPK-së.
