Ambasada e Britanisë së Madhe në Kosovë ka vlerësuar pozitivisht bashkëpunimin ndërmjet misionit të KFOR-it të udhëhequr nga NATO dhe Forcës së Sigurisë së Kosovës (FSK), në kuadër të operacionit të kërkim-shpëtimit pas zhdukjes tragjike të një personi në Liqenin e Ujmanit (Gazivodës).
Sipas njoftimit, operacioni është zhvilluar me autorizimin e Komandantit të KFOR-it për vendosjen e ekipeve të Kërkim-Shpëtimit të FSK-së, dhe është cilësuar si dëshmi e aftësive të avancuara të kësaj force dhe në përputhje me marrëveshjet ekzistuese ndërmjet KFOR-it dhe FSK-së.
“Operacioni është testament për përsosmërinë e aftësive të Kërkim-Shpëtimit të FSK-së dhe në përputhje me marrëveshjet e gjata midis KFOR-it dhe FSK-së. Ne e përgëzojmë KFOR-in për ofrimin e mbështetjes dhe sigurisë gjatë gjithë këtij operacioni dhe i ofrojmë ngushëllime familjes së njeriut që mjerisht humbi jetën,” thuhet në deklaratën e Ambasadës britanike.
Britania e Madhe theksoi përkushtimin e saj për të mbështetur misionin e KFOR-it dhe rolin e tij kyç në ruajtjen e paqes dhe sigurisë në Kosovë, duke nënvizuar rëndësinë e bashkëpunimit ndërinstitucional në operacione të ndjeshme dhe emergjente.
