Një zjarr i madh ka shpërthyer të dielën mbrëma, më 3 gusht 2025, rreth orës 18:53, në një lokal përgjatë magjistrales Kaçanik–Ferizaj.
Sipas njoftimit të Policisë së Kosovës për rajonin e Ferizajt, njësitet e zjarrfikësve, patrullat policore dhe Njësia e Hetimeve nga Stacioni Policor në Kaçanik janë mobilizuar menjëherë dhe kanë dalë në vendin e ngjarjes për të ndërmarrë veprimet e nevojshme.
Për të parandaluar përhapjen e mëtejshme të zjarrit dhe rrezikun potencial, është njoftuar edhe njësia e KEDS-it, e cila ka ndërprerë furnizimin me energji elektrike në zonën e prekur.
Sipas të dhënave fillestare, dyshohet se zjarri ka filluar nga djegia e disa gomave të vendosura jashtë lokalit. Flakët janë përhapur më pas duke përfshirë një lokal gomisterie, një pjesë të një lokali tjetër me dëme të vogla, si dhe një pjesë të një shtëpie përreth.
Vlera e dëmit material dyshohet të jetë dhjetëra mijëra euro, derisa hetimet për zbardhjen e plotë të rastit janë në proces, thotë policia.
Deklarata është dhënë nga zëdhënësi i Policisë së Kosovës për rajonin e Ferizajt, Kanun Veseli.
