Policia Rajonale e Prishtinës ka vazhduar me aktivitete të shtuara gjatë javës së kaluar, duke realizuar 104 urdhëresa gjykate në lokacione të ndryshme dhe përmes aksioneve të ndara. Sipas njoftimit, 48 nga këto urdhëresa lidhen me vepra penale, ndërsa të tjerat kanë pasur të bëjnë me kundërvajtje, seanca gjyqësore dhe verifikime të ndryshme.
Sipas Policisë, personat e dënuar me burgim janë dërguar për vuajtje të dënimit, ndërsa ata të dënuar me gjobë janë liruar pasi kanë përmbushur obligimet e tyre sipas urdhëresave.
Në të njëjtën periudhë, në kuadër të angazhimeve për siguri publike, policia ka sekuestruar 12 armë zjarri të llojeve dhe kalibrave të ndryshëm, si dhe qindra municione, duke parandaluar rrezikun nga përdorimi i tyre i mundshëm.
Në sferën e sigurisë rrugore, policia ka vazhduar me kontrollet e rregullta, duke shqiptuar 4,062 gjoba për kundërvajtje të ndryshme në trafik. 641 prej tyre janë evidentuar nga veturat inteligjente dhe automjetet me radar mobil.
Policia e Rajonit të Prishtinës thekson se vazhdon angazhimin në ruajtjen e rendit dhe sigurisë publike, duke ftuar qytetarët për bashkëpunim të vazhdueshëm.
