Ministrja në detyrë e Drejtësisë, Albulena Haxhiu, ka kritikuar sistemin e drejtësisë për numrin e paktë të dënuarve për veprën penale “Fajdeja”, teksa ka bërë krahasim me gjendjen aktuale.
“Aktualisht, nga 1,752 persona që mbahen në institucionet korrektuese të Kosovës, prej tyre vetëm 4 janë të dënuar për veprën penale “Fajdeja” dhe 8 janë në paraburgim. Ky realitet është alarmues dhe tregon që pavarësisht ndikimit të madh që këto vepra kanë mbi jetën e qytetarëve, pasojat e tyre sociale dhe shpesh edhe tragjike, sistemi ynë i drejtësisë nuk po i trajton me seriozitetin dhe vendosmërinë që kërkohet”, ka shkruar ajo në facebook.
Haxhiu ka thënë se këto vepra janë pjesë e një zinxhiri kriminal që godet më të pambrojturit dhe kontribuon në një ndjenjë të thellë padrejtësie në shoqëri.
“Rastet e fundit tragjike janë një dëshmi e qartë për pasojat që sjell neglizhenca institucionale ndaj këtyre fenomeneve. Me urgjencë duhet të rishikohen politikat ndëshkimore dhe të forcohet aspekti i hetimeve dhe ndjekjes penale për veprën penale të fajdes. Ne nuk mund të flasim për një shtet të së drejtës derisa kriminelët ecin të lirë, ndërsa viktimat jetojnë në frikë dhe pasiguri”, ka shkruar ajo.
Tre persona kanë mbetur të vrarë si pasojë e të shtënave me armë zjarr në Gjilan. Të dyshuarit për kryerjen e rastit janë Mefail Shkodra, 53 vjeç, si dhe djemtë e tij, Edonis Shkodra, 25 vjeç, dhe Engjull Shkodra, 22 vjeç, të cilët po kërkohen nga institucionet e sigurisë.
