Policia e Kosovës ka raportuar për disa raste të përdorimit të armëve të zjarrit dhe armëmbajtjes pa leje, duke rezultuar me arrestime dhe sekuestrime të armëve të ndryshme, përfshirë edhe armë automatike.
Një person është arrestuar në Medvec të Lipjanit pasi kishte shtënë me armë zjarri gjatë një ahengu familjar. Policia i ka sekuestruar një armë automatike AK-47 dhe 18 gëzhoja. Me vendim të prokurorit, i dyshuari është dërguar në mbajtje.
Një tjetër i dyshuar në Janjevë të Lipjanit është shoqëruar në stacion policor pasi që në një aheng kishte shtënë me një pistoletë me gaz, e cila është sekuestruar. Me vendim të prokurorit, rasti do të trajtohet në procedurë të rregullt.
Ndërsa në Ferizaj një burrë është arrestuar një ditë pas një rasti të dhunës në familje, ku kishte ushtruar dhunë fizike dhe kishte kanosur me jetë bashkëshorten e tij. Policia i ka sekuestruar një pushkë gjysmë automatike dhe 10 fishekë. Viktima ka marrë trajtim mjekësor, ndërsa i dyshuari është dërguar në mbajtje.
Një person tjetër gjithashtu në Ferizaj është shoqëruar në polici pasi kishte shtënë disa herë në ajër me pistoletë, nga e cila janë sekuestruar edhe gjashtë gëzhoja. Rasti shkon në procedurë të rregullt.
Dy persona, njëri prej tyre i mitur, janë arrestuar Llazicë të Malishevës pasi në rrjetet sociale ishte publikuar një fotografi ku njëri nga të dyshuarit mbante një pistoletë me gaz. Pas intervistimit, të dy janë liruar dhe rasti trajtohet në procedurë të rregullt.
Dy të dyshuar tjerë janë arrestuar në Malishevë pasi kishin shtënë me armë gjatë një ahengu. Janë sekuestruar një pushkë gjuetie me 16 fishekë, një revole dhe 17 gëzhoja.
Kurse në Rahovec një person është arrestuar pasi gjatë kontrollit në shtëpinë e tij janë gjetur dhe sekuestruar dy pistoleta me gaz dhe 206 fishekë.
