Drejtori i Urbanizmit në Prizren, Pranverim Berisha, ka akuzuar ministrin në detyrë Hajrulla Çeku se ka përdorur prokurorin për t’i shantazhuar në fillim të fushatës për zgjedhjet e 12 tetorit.
Sipas Berishës, një prokuror që, siç thotë ai, është në përfundim të mandatit dhe i afërt me ministrin Çeku, ka ngritur një aktakuzë për një rast të cilin, sipas tij, e kanë sqaruar më herët me argumente ligjore.
Berisha pretendon se Ministria e Kulturës ka neglizhuar me qëllim trajtimin e kërkesës së Zyrës për Urbanizëm dhe Planifikim Hapësinor, për të krijuar alibi ligjore për ndërhyrje politike.
“Është e papranueshme që në fillim të fushatës zgjedhore të përdoren instrumentet e drejtësisë për shantazh politik. Ministri Çeku, në vend që të japë llogari për keqpërdorimet e shumta financiare në ministrinë që ka udhëhequr, përpiqet të zhvendosë vëmendjen me akuza të pabaza”, tha Berisha.
Ai gjithashtu ka akuzuar Çekun për favorizime të shumta financiare brenda ministrisë, duke përmendur pagesa në shuma të mëdha ndaj familjarëve dhe të afërmve të eksponentëve politikë.
“257 mijë euro për vëllain e tij, 255 mijë euro për motrën e deputetit Artan Abrashi, dhe 52 mijë euro për bashkëshortin e deputetes Fitore Pacolli. Për aferën e ‘Sarajit të Vjetër’, vendi i Hajrulla Çekut dhe zyrtarëve të tjerë të MRKS është në prokurori, e jo në pushtet”, shtoi ai.
Pavarësisht këtyre zhvillimeve, Berisha theksoi se beson në drejtësinë e pavarur dhe në profesionistët që nuk bien pre e lojërave politike.
