Me ftesë të JICA-s së Japonisë, një delegacion i Radiotelevizionit të Kosovës, i kryesuar nga drejtori i Televizionit, Rilind Gërvalla, njëherësh menaxher i projektit, po qëndron në Tokio, ku po ndjek trajnime për zhvillimin e kapaciteteve të transmetuesit publik.
Gjatë ditës së sotme, Gërvalla u takua me përfaqësues të transmetuesit publik japonez, NHK, nga të cilët mori premtime për mbështetjen e RTK-së me përmbajtje programore. Konkretisht, RTK do të përfitojë rreth 70 dokumentarë historikë, programe për fëmijë dhe përmbajtje të tjera, të cilat pas përkthimit do të transmetohen në RTK1 dhe RTK2.
Kjo mbështetje e radhës për RTK-në nga populli japonez po realizohet nga organizata e licencuar shtetërore japoneze JAMCO, në bashkëpunim me transmetuesin publik NHK.
Kujtojmë se në kuadër të mbështetjes shumëvjeçare të shtetit japonez për RTK-në, aktualisht po zbatohet faza e tretë e projektit të JICA-s, e cila parasheh hapjen e zyrës rajonale në Pejë. Kjo zyrë do të jetë e treta me radhë e mbështetur nga JICA, pas atyre në Prizren dhe Mitrovicë.
