Zëvendëskryeministri i parë në detyrë për Integrim Evropian, Zhvillim dhe Dialog i Kosovës, Besnik Bislimi, në kuadër të vizitës së tij në Kopenhagë, ka zhvilluar takim me Sekretaren e Shtetit për Çështje Evropiane të Kroacisë, Andreja Metelko-Zgombiq.
Në këtë takim u diskutua për thellimin e mëtejshëm të marrëdhënieve bilaterale ndërmjet Kosovës dhe Kroacisë, si dhe fuqizimin e bashkëpunimit në fusha të ndryshme, me theks të veçantë në ekonomi, njofton zyra për informim e Kryeministrit.
Zëvendëskryeministri Bislimi ka theksuar progresin e arritur në katër vitet e fundit në rritjen ekonomike të vendit, duke përmendur performancën pozitive të ndërmarrjeve publike dhe ndarjen e fitimit vjetor të Bankës Qendrore të Kosovës në llogarinë e Qeverisë. Ai ka vlerësuar se për të dytin vit me radhë, BQK ka transferuar këtë shumë në përputhje me ligjin, nga 10 milionë euro në vitin 2024 në 15 milionë euro këtë vit.
Bëhet e ditur se temë e diskutimit po ashtu ishin aspiratat dhe synimet e Kosovës për anëtarësim në Këshillin e Evropës dhe marrjen e statusit të vendit kandidat për anëtarësim në Bashkimin Evropian.
Zëvendëskryeministri Bislimi ka shprehur mirënjohjen ndaj Kroacisë për mbështetjen dhe përkrahjen e parezervë që i ka dhënë Kosovës në proceset integruese dhe në forcimin e subjektivitetit ndërkombëtar të vendit, thuhet pos tjerash në këtë njoftim.
