Me rastin e 26-vjetorit të krijimit të Policisë së Kosovës, drejtori i Përgjithshëm i Policisë së Shtetit, Ilir Proda, zhvilloi një vizitë zyrtare në Prishtinë me ftesë të drejtorit të Përgjithshëm të Policisë së Republikës së Kosovës, kolonel Gazmend Hoxha. Partneriteti me Policinë e Kosovës, siç tha Proda, krijon garanci për sigurinë rajonale.
Gjatë vizitës, Proda shprehu falënderimet për ftesën dhe mundësinë që Policia e Shtetit të ishte pjesë e festimeve, duke theksuar rëndësinë e kësaj ngjarjeje për institucionin e sigurisë në Kosovë.
“Jam i nderuar dhe krenar që, në emër të Policisë së Shtetit shqiptar, të uroj Policinë e Kosovës për 26-vjetorin e krijimit të saj. Ata burra e gra që dje luftonin për lirinë, sot luftojnë e punojnë për sigurinë e shtetit dhe qytetarëve tanë. Jam këtu për të uruar vëllezërit dhe motrat tona për punën, sakrificën dhe rezultatet e arritura për më shumë se dy dekada e gjysmë”, deklaroi Proda, transmeton RTSH.
Ai shtoi se Policia e Kosovës ka dëshmuar profesionalizëm dhe përkushtim në shërbim të qytetarëve, ndërsa bashkëpunimi mes dy policive është një garanci e fortë për sigurinë e përbashkët. “Ju uroj të mbani me nder flamurin e shtetit tuaj dhe atë kombëtar, dhe të përmbushni sa më mirë misionin tonë, sa të vështirë aq edhe fisnik: të mbrojmë jetën me jetë. Në frymën e vëllazërisë, do të forcojmë bashkëpunimin për të goditur krimin e organizuar dhe trafiqet”, tha ai.
Nga ana e tij, drejtori i Policisë së Kosovës, kolonel Gazmend Hoxha, falënderoi delegacionin e Policisë së Shtetit për praninë në aktivitetet e përvjetorit, duke vlerësuar lart bashkëpunimin e deritanishëm. Ai theksoi se ky partneritet i shkëlqyer do të thellohet akoma më shumë, për të mirën e qytetarëve të të dy vendeve.
Në kuadër të festimeve, u zhvillua edhe një ndeshje miqësore volejbolli mes ekipeve të Policisë së Shtetit dhe Policisë së Kosovës. Në këtë aktivitet sportiv morën pjesë edhe dy drejtorët, Proda dhe Hoxha, të cilët në fund të ndeshjes shkëmbyen fanellat si simbol i miqësisë dhe bashkëpunimit.
Ky aktivitet u cilësua si një tjetër tregues i marrëdhënieve të forta dhe i frymës së bashkëpunimit mes dy institucioneve të rendit dhe sigurisë.
