Gjatë javës së kaluar, zyrtarët policorë të rajonit të Prishtinës kanë realizuar 182 urdhëresa të gjykatës në lokacione të ndryshme dhe përmes aksioneve të ndara.
Nga këto, 52 urdhëresa kanë qenë të lidhura me vepra penale, ndërsa pjesa tjetër kanë pasur të bëjnë me kundërvajtje, seanca gjyqësore, verifikime dhe urdhëresa të tjera të natyrës procedurale.
Sipas Policisë, pas përfundimit të procedurave të parapara, personat e dënuar me burgim janë dërguar për vuajtje të dënimit, ndërsa ata të dënuar me gjoba janë liruar pasi kanë kryer obligimet financiare të përcaktuara në urdhëresat përkatëse.
Policia ka vazhduar aktivitetet edhe në segmente të tjera të sigurisë, ku gjatë së njëjtës periudhë kohore janë sekuestruar tri armë zjarri të llojeve dhe kalibrave të ndryshëm.
Po ashtu, në kuadër të kontrolleve dhe patrullimeve të rregullta, janë shqiptuar gjithsej 5103 masa administrative me gjobë për lloje të ndryshme të kundërvajtjeve dhe shkeljeve të kodit rrugor.
Nga to, 970 gjoba janë evidentuar përmes veturës inteligjente dhe veturës me radar mobil.
