Presidenti i SHBA-së, Donald Trump, nuk e mbështeti vendimin e Izraelit për të sulmuar udhëheqësit politikë të grupit Hamas (i njohur si terrorist nga SHBA-ja dhe BE-ja) që ndodhen në Katar, tha të martën Sekretarja e Shtypit e Shtëpisë së Bardhë, Caroline Leavitt.
“Ndërsa eliminimi i Hamasit është një qëllim i denjë, goditja e Dohës nuk është në interes as të Izraelit dhe as të Shteteve të Bashkuara”, tha ajo. Leavitt tha se Trump, i cili e sheh Katarin si një “aleat të besuar dhe mik të Shteteve të Bashkuara”, shprehu keqardhje për sulmin izraelit. Ajo vuri në dukje se presidenti i dha udhëzime të dërguarit të posaçëm Steve Witkoff që të njoftonte “menjëherë” autoritetet e Katarit për sulmin e afërt. Trump më pas zhvilloi biseda telefonike me udhëheqjen e Izraelit dhe Katarit.
Megjithatë, autoritetet e Katarit thanë se nuk kishin marrë asnjë njoftim paraprak për sulmin e afërt izraelit, raportoi AFP.
Leavitt shtoi se ushtria amerikane i kishte informuar zyrtarët e administratës rreth sulmit të afërt izraelit, por nuk pranoi të thoshte nëse ky informacion vinte direkt nga izraelitët apo nga inteligjenca amerikane.
