Avokati i tyre thotë se çifti Macron do të paraqesë dokumente në një padi për shpifje që ata ngritën kundër influencueses së krahut të djathtë Candace Owens, pasi ajo promovoi bindjen e saj se Brigitte Macron ka lindur mashkull, shkruan BBC.
Duke folur për podkastin Glory Under Fire të BBC-së, avokati i Macronëve, Tom Clare, thotë se Brigitte i gjeti pretendimet tepër shqetësuese dhe se ato ishin një “shpërqendrim” për presidentin francez.
“Është një proces që ajo do të duhet ta kalojë në një mënyrë shumë publike. Por ajo është e gatshme për të. Ajo është e vendosur të bëjë gjithçka që duhet për t’i rregulluar gjërat”, tha avokati.
Kur u pyet nëse Macronët do të paraqisnin fotografi të Brigitte-s ku ajo shfaqet shtatzënë, Clare tha se ato ekzistojnë dhe se do të paraqiten në gjykatë ku ka rregulla dhe standarde.
Owens, një ish-kolumniste për gazetën konservatore amerikane Daily Wire, e cila ka miliona ndjekës në rrjetet sociale, ka shprehur vazhdimisht qëndrimin e saj se Brigitte Macron është burrë.
Në mars të vitit 2024, ajo pretendoi se akuza do të vinte në rrezik “të gjithë reputacionin e saj profesional”.
Në çështjet amerikane të shpifjes kundër figurave publike, paditësve u kërkohet të provojnë “keqdashjen reale”, domethënë që i pandehuri me vetëdije ka përhapur informacion të rremë ose ka vepruar me shpërfillje të pamatur të së vërtetës.
