Votën edhe për një mandat, Përparim Rama, kandidat i Lidhjes Demokratike të Kosovës, ua kërkoi sot banorëve të kryeqytetit, të cilëve u premtoi se do të punojë në jetësimin e projekteve të rëndësishme në të mirë të tyre.
Bashkë me të në Degën II të Prishtinës, qëndroi edhe kryetari i kësaj partie, Lumir Abdixhiku i cili tha se vetëm me këtë forcë politike, përfundohen projektet e mëdha për Prishtinën e Kosovën.
“Prishtina është motorri i zhvillimit dhe nuk është rastësi që në këtë motorr LDK gjithmonë ka qenë si në shtëpinë e vet. Kur qytetarët kërkojnë vizion e punë, gjithmonë e gjejnë rrugën te LDK. 4 vite më parë ne erdhëm me një vizion të ri, me një kandidat të jashtëzakonshëm, ne e sollëm Përparim Ramën, një njeri që vinte nga bota e arkitekturës dhe urbanizmit për ta kthyer Prishtinën në një qytet të së ardhmes. Përparim Rama u bë arkitekti i kryeqytetit tonë modern”, tha ai.
Abdixhiku theksoi se me Ramën, jo vetëm në Prishtinë, por edhe në nivel të Kosovës, është realizuar projekti më i madh, ai i mësimit gjithëditor.
E në fjalën e tij, Përparim Rama u shpreh se me të në drejtimin e kryeqytetit, janë realizuar projekte të shumta, përfshirë pastrimin e zonave të ndryshme, asfaltimin e rrugëve e zgjerimin e rrjetit të kanalizimit.
Rama u zotua për transofrmimin e kryeqytetit, bashkë edhe me kandidatët e LDK për Kuvendin Komunal.
“4 vitet e ardhshme i shoh si 4 vite të lulëzuara të Prishtinës. Më 12 tetor me të parën do të fitojmë pa balotazh. Po flasim se na po ndërtojmë vetëm sheshe. Ende nuk kemi ndërtuar boll. Do të vazhdojmë sepse qyteti duhet të jetë i qytetarit, do të krijohen hapësira të sigurta, të shëndetshme. Propozimet tona e kanë një ide e cila ndërlidhet me një shesh 2.6 km që lidhet me shëndetin e qytetarëve. Po ashtu i lidhim 10 lagje të mëdha të kryeqytetit”, ka thënë ai.
Në këtë tubim elektoral të LDK-së u tha se Përparim Rama, ka dëshmuar veten si vizionar në kryeqytet me ndryshimet që ka bërë deri më tani dhe të tjerat që ka planifikuar për katër vitet e ardhshme.
