Presidenti turk, Recep Tayyip Erdogan, foli për planin e paraqitur amerikan për Gazën dhe përshëndeti përpjekjet dhe lidershipin e Trumpit në lidhje me këtë çështje.
Në një koment në rrjetet sociale, Erdogan tha se gjakderdhja duhej të parandalohej.
“Përgëzoj përpjekjet dhe lidershipin e Presidentit të SHBA-së, Donald Trump, që synojnë ndalimin e gjakderdhjes në Gaza dhe arritjen e një armëpushimi”, tha Erdogan.
Ai gjithashtu thekson se Turqia do të vazhdojë të marrë pjesë në këtë proces.
“Turqia do të vazhdojë të kontribuojë në këtë proces me qëllim vendosjen e një paqeje të drejtë dhe të qëndrueshme të pranueshme për të gjitha palët”, shtoi Erdogan.
Më herët, Erdogan foli me gazetarët rreth takimeve të tij në Amerikë dhe theksoi se gjatë Asamblesë së Përgjithshme të OKB-së, si dhe gjatë bisedimeve me Trump, ai foli qartë për qëndrimin e Turqisë ndaj Gazës.
“Pavarësisht përpjekjeve të Izraelit për ta penguar atë, kauza palestineze dominoi Asamblenë e Përgjithshme të OKB-së. Konferenca mbi zgjidhjen me dy shtete tërhoqi një interes të konsiderueshëm. Iu drejtova Asamblesë së Përgjithshme për të 13-tën herë. Në fjalimin tim theksova masakrën, e cila tani është përshkallëzuar në egërsi. Këtu e kemi zbuluar masakrën në fotografi. E kemi treguar qartë pozicionin e vendit tonë”, shpjegoi ai.
