Policia e rajonit të Prishtinës, gjatë javës së kaluar, ka realizuar 151 urdhëresa të gjykatës në lokacione të ndryshme përmes aksioneve të ndara.
Nga këto, 39 urdhëresa kanë qenë për vepra penale, ndërsa pjesa tjetër ka pasur të bëjë me kundërvajtje, seanca gjyqësore, verifikime e procedura të tjera ligjore.
Sipas njoftimit të policisë, pas përfundimit të procedurave të parapara, personat e dënuar me burgim janë dërguar për vuajtje të dënimit, ndërsa ata të dënuar me gjoba janë liruar pasi kanë përmbushur obligimet e përcaktuara në urdhëresa.
Përveç zbatimit të urdhëresave, aktivitetet policore janë shtrirë edhe në segmente të tjera të sigurisë. Gjatë të njëjtës periudhë, janë sekuestruar 7 armë zjarri të llojeve dhe kalibrave të ndryshëm.
Po ashtu, janë shqiptuar 3920 masa administrative me gjobë për kundërvajtje dhe shkelje të ndryshme të kodit rrugor, prej të cilave 298 janë evidentuar nga vetura inteligjente dhe ajo me radar mobil.
Policia ka theksuar se do të vazhdojë me angazhim të shtuar për të garantuar rendin, sigurinë dhe respektimin e ligjit në rajonin e Prishtinës.
