Në tubim qendror të Partisë së Re Demokratike (NDS) morën pjesë simpatizantë të shumtë, anëtarë dhe përfaqësues të komuniteteve të ndryshme, të cilët shfaqën interesim të madh për planet dhe vizionin që kjo parti ofron për të ardhmen e qytetit.
Kandidatja për kryetare të komunës, Emilija Rexhepi, prezantoi objektivat kryesore të programit, që përqendrohen në përmirësimin e infrastrukturës, zhvillimin ekonomik, mbështetjen e të rinjve dhe rritjen e transparencës në pushtetin lokal.
“Si kandidate për kryetare të Prizrenit do të jem zëri juaj për një jetë më të mirë për të gjitha komunitetet. Prizreni është qytet që na bashkon e jo që na ndan. Synimi im është që Prizreni të jetë qytet i zhvillimit e drejtësisë, qytet ku ekonomia shkon bashkë me jetën sociale, do të krijojë mundësitë për investime të sigurta, funksionalizimin e zonës industriale dhe vende të reja të punës, fabrika e rrugë të reja dhe infrastrukturë moderne”, ka thënë Rexhepi.
Në fjalimin e saj, Emilija Rexhepi theksoi rëndësinë e unitetit, mundësive të barabarta për të gjithë qytetarët dhe pjesëmarrjen më të fuqishme të komunitetit boshnjak në jetën politike të qytetit.
Tubimi u përmbyll në një atmosferë pozitive, me mesazhin se përmes përpjekjeve të përbashkëta dhe udhëheqjes së përgjegjshme, Prizreni mund të bëhet shembull i përparimit dhe i bashkëjetesës multietnike.
