Bastion i pathyeshëm për Aleancën për Ardhmërinë e Kosovës po konsiderohet komuna e Klinës me në krye Zenun Elezajn. AAK premtoi projekte për trajtimin e ujërave të zeza, subvencione në bujqësi, ndërtimin e shkollave dhe çerdheve të reja, si dhe projekte për ngrohjen qendrore. Elezaj tha se Klinën do ta fitojnë pa balotazh.
Votën edhe për një mandat ua ka kërkuar banorëve të Klinës kandidati i AAK-së për kryetar të kësaj komune, Zenun Elezaj.
Para tyre, Elezaj dhe kryetari i AAK-së, Ramush Haradinaj, shpalosën planin zhvillimor, i cili parasheh realizimin e një sërë projektesh të rëndësishme për Klinën.
Haradinaj tha se në Klinë, Elezaj nuk ka konkurrencë.
“Të gjithë kanë të drejtë të kërkojnë votë. Por ju tregoj se është e pamundur që dikush t’i afrohet këtij njeriu, nga ata që garojnë është e pamundur t’i afrohen Zenun Elezaj. Zenun Elezaj, që e njoh dhe që e kam parë, i kalon këta. Komuna e Klinës është vlerësuar më së larti nga auditori në bazë të punës që është bërë,” tha Haradinaj.
Ai theksoi se prapa Elezajt qëndron një ekip profesionistësh.
“Zenuni mund të vlerësohet edhe për punën ekipore. Nuk ka thënë vetëm ‘unë jam’. Profesori ka pasur shumë kujdes për të zgjedhur ekipën, për të punuar dhe për t’i besuar ekipës. Këta njerëz që garojnë e meritojnë votën tuaj. Më 12 tetor, mendoj se ju e keni më së lehti nga shumë komuna të tjera. Një është për ta zgjedhur, ai është Zenun Elezaj”, tha Haradinaj mes tjerash.
Ndërsa Elezaj deklaroi se me të në krye, për 8 vjet janë arritur suksese të mëdha në Klinë.
“Para 8 viteve, kur fillova garën për kryetar të Klinës, Aleanca në Klinë ishte përballë sfidave të mëdha. Në ato rrethana, me vizionin e drejtë, me besueshmërinë e qytetarëve te programi ynë dhe dëshprimin te qeverisja e atëhershme, kemi arritur të fitojmë në Klinë. Për 8 vjet ne kemi arritur suksese të mëdha dhe kemi dhënë shembullin më të mirë të qeverisjes lokale. Për 8 vjet kemi qeverisur me duar të pastra. Jemi shpërblyer si komuna më transparente,” deklaroi ai.
Elezaj premtoi projekte për trajtimin e ujërave të zeza, ndërtimin e shkollave dhe çerdheve të reja, projekt për ngrohjen qendrore dhe subvencione në bujqësi.
“Do t’i ndërtojmë edhe 4 impiante të reja për trajtimin e ujërave të zeza. Do të investojmë në fabrikën e ujit të pijes. Do të bëhet ndërtimi i tranzitit të qytetit. Do të bëjmë hartimin e projektit për ngrohjen qendrore. Kemi ndërtuar 10 parqe në fshatra. Do të ndërtojmë edhe 20 parqe të reja. Kemi planifikuar të ndërtojmë shkollën e re në Zllakoqan. Do të ndërtojmë objektin shëndetësor. Do të investojmë në rregullimin e parkingjeve të reja, rregullimin e shtretërve të lumenjve, do të ketë subvencione në bujqësi,” shtoi Elezaj.
Klina është konsideruar si bastion i pathyeshëm për AAK-në.
