Policia e Kosovës ka bërë me dije se shtatë persona janë arrestuar sot në Podujevë, pas një aksioni së bashku me Prokurorin e Shtetit.
Sipas njoftimit, informatat e siguruara në rrugë operative, kanë mundësuar që hetuesit të identifikojnë një lokacion në fshatin Shtedime, ku dyshohej për veprimtari të paligjshme me substanca narkotike.
Po ashtu bëhet me dije se arrestimi i tyre u krye në një shtëpi dhe se të dyshuarit ishin të gjithë shtetas të Shqipërisë, në mesin e tyre pesë gra dhe dy burra.
Ndërsa, në vendngjarje përveç një sasie të konsiderueshme të substancave narkotike, është gjetur edhe aparaturë e përshtatur për tharjen e bimëve narkotike.
“Në asistim të njësisë së hetimeve kanë marrë pjesë edhe njësitë intervenuese, ndërkohë që pas arrestimit të personave të dyshuar në vendngjarje janë ftuar edhe zyrtarët nga njësiti antidrogë, në koordinim me të cilët do të ndërmerren veprimet e mëtejme”, thuhet në njoftim.
