Kryetari i Lëvizjes Vetëvendosje, Albin Kurti në ditën e fundit të fushatës qëndroi në Podujevë, ku kërkoi nga llapjanët votë për kandidatin për kryetar, Shpejtim Bulliqi edhe për një mandat qeverisës.
Kurti tha se me Bulliqin kryetar, Podujevën e presin projekte të mëdha e të prekshme që do të përmirësojnë jetën e qytetarëve.
“Puna dhe planet për përmirësimin e qytetit do të vazhdojnë edhe për një mandat me Shpejtim Bulliqin kryetar. Impianti i ujërave të zeza do ta ndryshoj përgjithmonë cilësinë e jetës për qytetin dhe fshatrat, ngrohtorja e qytetit, furnizimi 24h me ujë të pijshëm në çdo shtëpi përmes qytetit të Pollatës, zona industriale do të shtrihet në 30 hektar, parcela për investitor qe do ta bëj Podujevën qendër punësimi, mësimi gjithëditor në tërë Podujevën, do të ndërtohen shkolla të reja, do të zgjerohen shkollat aktuale, do të rritet fondi i bursave studentore që mbështet studentët e dalluar dhe familjet në nevojë”, ka thënë ai.
Ndërsa kandidati për kryetar të Podujevës, Shpejtim Bulliqi tha se është krenar për qeverisjen e deritanishme, derisa kërkoi besim edhe për një mandat tjetër në krye të komunës.
“Kemi ende shumë punë për të ndërtua çdo lagje, fshat, shtëpi, rrugët, shkollat, ambulancat, ndriçimi janë dëshmi e punës që nuk jemi ndal asnjëherë. Nuk është e lehtë ta ndryshosh komunën, por e pamundura bëhet e mundur. Kjo nuk është luftë për individ por për të ardhmen e fëmijëve, kërkoj mbështetje për punët që kemi nis, premtimet i merr era por punët mbesin këtu dhe me projektet tona do ta transformojmë qytetin tonë”, ka thënë ai.
Në Podujevë, Vetëvendosje garon në koalicion me Listën Guxo me 39 kandidatë për asamblenë komunale.
