Prokuroria Speciale e Republikës së Kosovës ka ngritur aktakuzë ndaj tre personave për vepra të ndryshme penale që lidhen me fajden dhe detyrimin.
Sipas njoftimit, të pandehurit P.T. dhe A.G. akuzohen për veprën penale “Detyrimi”, ndërsa i pandehuri M.A. për veprat penale “Fajdeja” dhe “Mbajtja në pronësi, kontroll ose posedim të paautorizuar të armëve”.
Hetimet e Prokurorisë kanë vërtetuar se gjatë viteve 2022–2023, P.T. dhe A.G., me qëllim të përfitimit të kundërligjshëm pasuror, kanë detyruar viktimën B.P. të ndërmarrë veprime në dëm të pasurisë së tij, thuhet në njoftim.
Sipas aktakuzës, P.T. e kishte autorizuar viktimën për shitjen e një lokali në pronësi të tij, duke e mashtruar se llogaria bankare i ishte bllokuar. Viktima kishte lidhur kontratë për shitjen e lokalit me A.G. në vlerë prej 150 mijë eurosh.
Më pas, A.G., me arsyetimin se kontrata nuk ishte realizuar, e kishte kanosur dhe detyruar viktimën të paguante shuma të mëdha parash. Ndërkohë, i pandehuri M.A. akuzohet se e kishte detyruar viktimën të kthente trefishin e shumës së borxhit që kishte marrë për shkak të gjendjes së rënduar financiare, njofton Prokuroria Speciale.
Sipas aktakuzës, viktima është dëmtuar në një shumë që kalon 100 mijë euro.
Prokuroria Speciale ka bërë të ditur se do të kërkojë dënim sipas ligjit për të pandehurit, ndërsa rasti vazhdon në fazën gjyqësore.
