Gjykata Supreme e Kosovës ka organizuar sot tryezë diskutimi me gjyqtarë të Gjykatës Themelore në Mitrovicë me qëllim të adresimit të sfidave aktuale dhe unifikimit të praktikës gjyqësore, tryezë kjo e mbështetur nga OSBE-ja.
Kryetari i kësaj gjykate, Fejzullah Rexhepi, ka nënvizuar rëndësinë e harmonizimit të praktikës gjyqësore si në lëminë civile ashtu edhe në atë penale, për të siguruar trajtim të barabartë të rasteve dhe zbatim të njëtrajtshëm të ligjit.
“Gjyqtarët e lëmisë penale po diskutojnë çështje që lidhen me problemet praktike të aspekteve procedurale dhe materiale, si dhe me unifikimin e praktikës lidhur me dënimet për rastet e ngjashme, duke analizuar edhe zbatimin e Udhëzuesit për Matjen e Dënimit. Ndërkohë, gjyqtarët e lëmisë civile po trajtojnë tema që ndërlidhen me menaxhimin e lëndëve civile në gjykatat themelore, probleme praktike të aspekteve materiale, standardet e arsyetimit në çështjet civile dhe rolin e këtyre gjykatave në unifikimin e praktikës gjyqësore”, thuhet në njoftimin e Gjkykatës Supreme.
Bëhet e ditur se cikli i këtyre diskutimeve, do të përmbyllet me 27 tetor me tryezën e organizuar me gjyqtarët e Gjykatës Komerciale dhe gjyqtarët e Gjykatës Themelore në Prishtinë.
