Ushtruesi i detyrës së Kryeprokurorit të Shtetit, Besim Kelmendi, mori pjesë në publikimin e raportit “Performanca e sistemit gjyqësor dhe prokurorial dhe vlerësimi qytetar ndaj këtyre institucioneve”, organizuar nga Grupi për Studime Juridike dhe Politike (GLPS) me mbështetjen e SMART Balkans.
Raporti paraqet të dhëna dhe analiza mbi perceptimin e qytetarëve për punën e institucioneve të drejtësisë dhe ofron një pasqyrë të gjerë të performancës së sistemit gjyqësor dhe prokurorial në Kosovë, njofton zyra për informim e PSH-së.
Gjatë fjalës së tij, Kelmendi theksoi se gjetjet e raportit, sipas të cilave Prokuroria e Shtetit ka përfunduar 90% të rasteve penale të pranuara në punë, tregojnë qartë për efikasitetin dhe përkushtimin e këtij institucioni në përmbushjen e misionit të tij.
Ai nënvizoi se pavarësia institucionale mbetet synimi kryesor i Prokurorisë së Shtetit, duke shtuar se për drejtësi më efikase duhet siguruar numër i mjaftueshëm i prokurorëve në raport me vëllimin e lëndëve dhe kërkesat e gjykatave.
Bëhet e ditur se Kelmendi theksoi gjithashtu se vlerësimi i performancës së prokurorëve ka bërë që vetëm ata me rezultate të mira të avancohen në karrierë, ndërsa prokurorët me performancë të dobët nuk do të kenë vend në sistemin prokurorial.
Në përmbyllje, ai vlerësoi roli e organizatave të shoqërisë civile në përparimin e sundimit të ligjit dhe në rritjen e besimit të qytetarëve në institucionet e drejtësisë, duke theksuar rëndësinë e bashkëpunimit ndërmjet institucioneve dhe shoqërisë civile në ndërtimin e një sistemi drejtësie më transparent dhe efikas.
