Përmes një postimi në rrjetet sociale, Abdixhiku ka thënë se Kurti nuk mund ta kuptojë “madhështinë e LDK-së” dhe se “parimet e fjalën e dhënë nuk i njeh”.

“Jam i bindur se parimet nuk i kupton. Fjalën e dhënë edhe më pak,” ka shkruar Abdixhiku.

Ai e ka akuzuar Kurtin për bllokim të shtetit dhe shkelje të Kushtetutës, duke thënë se sjellja e tij politike ka dëmtuar institucionet e vendit.

“Një njeri që për tetë muaj bllokon shtetin duke thënë se i ka votat por s’po e lënë, dhe në fund mashtron; një njeri që për 48 herë e shkel Kushtetutën dhe mburret se çfarë po bën; një njeri që uzurpon institucionet duke qenë herë kryeministër e herë deputet; një njeri që s’i respekton gjykatat e Republikës siç respektohen ato në shtetin ku ai rrit familjen e vet”, ka shkruar ndër të tjera Abdixhiku.

Kryetari i LDK-së ka shtuar se Kurti “nuk e kupton bashkëpunimin, unitetin dhe afrimin si akt patriotik”, duke e akuzuar për përçarje dhe izolim të vendit.

“Një njeri që vetëm ofendon e vetëm përçan kudo që prek; një njeri që akuzon kundërshtarët politikë, shtëpinë e madhe të demokracisë me tradhtarë të Serbisë veç pse mendojnë ndryshe nga ai; një njeri që na ofendon elektoratin me ‘hajvanat’ dhe pret shtrirje qafe më pas”, ka shtuar ai.

Në fund të reagimit, Abdixhiku thekson se LDK-ja do të vazhdojë rrugën e saj politike të pavarur, duke ruajtur dinjitetin dhe vlerat që e kanë karakterizuar këtë parti historikisht.

“LDK-në mund ta sulmoni. Mund edhe ta ofendoni, por vetëm kaq keni mundësi. LDK po ecë drejt, në rrugën e vet. Për vete dhe për Republikën që e krijoi vet,” ka shkruar ai, duke përmbyllur me mesazhin: “LDK dje, LDK sot, LDK përgjithmonë! Dritë do të ketë!”